Тяньжины осолд амь үрэгдэгсдийн тоо 85 хүрэв

Хятадын Тяньжин хотын химийн бодис хадгалагдаж байсан агуулах дэлбэрсний улмаас амь үрэгдэгсдийн тоо 85 хүн болон нэмэгдлээ. Энэ тухай Синьхуа агентлагийн твиттерт өгүүлжээ.
China Daily сонины мэдээгээр, 17 мянган гэрийн аж ахуй, 1,7 мянган компани, 675 дэлгүүр дэлбэрэлтэд нэрвэгдэв. Мөн Тяньжиний боомтод 10 мянган автомашин шатжээ.

Дэлбэрсэн агуулахад хадгалагдаж байсан химийн бодисны бүрэн тоо хэмжээ өнөөдөр ч тодорхойгүй байна.

Техасийн химийн үйлдвэрийн агуулахад дэлбэрэлт гарлаа

Фото: @payden_nicole

Америкийн Техас мужийн химийн үйлдвэрийн агуулахад дэлбэрэлт гарсан тухай Associated Press дамжууллаа. Хьюстон хотоос 40 км”ийн зайтай Конро гэх жижиг хотын DrillChem компанийн агуулахад өнгөрсөн шөнө гал гаран бүх цогцолборыг хамаарсан байв.

Гал түймэрт аюулын гуравдугаар зэрэглэлийг өгсөн ба ослын газраас гурван км-ийн хүрээнд амьдардаг оршин суугчдийг гэрээсээ гарахгүй байхыг хотын захиргаа уриалсан тухай KPRC 2 телевиз дамжуулав. Агуулахад нь дэлбэрэлт, гал гарсан DrillChem компани нь занарын нефть олборлох, шатах тослох материалын үйлдвэрлэл хариуцдаг гэнэ. Энэ ослоор хохирогчдын тухай мэдээлэл гараагүй байна.

Камерун “Боко Харамтай” тэмцэхэд 2,5 мянган цэрэг илгээнэ

Камеруны эрх баригчид “Боко Харам” террорист бүлэглэлтэй тэмцэхэд 2,5 мянган цэргийн албан хаагчдаа илгээхээр шийдсэн тухай Agence France-Presse мэдээлэв.

“Камеруны ерөнхийлөгч олон улсын хүчинд нэгтгэхээр 2450 цэргийн албан хаагчдыг илгээх зөвшөөрөл өглөө” хэмээн тус орны Батлан хамгаалахын сайд Эдгар Ален Мебе Нго радиогоор мэдэгдсэн байна.

“Боко Харам” бүлэгтэй Камерунаас гадна Нигери, Чад, Нигер орнуудын цэргийнхэн тэмцэж байгаа бөгөөд олон улсын хүчний штаб нь Чадын нийслэл Нжамен хотод байрлаж байна.

Женева хотод шар айраг хамгийн өндөр үнэтэй

Дэлхийд хамгийн өндөр үнэ бүхий шар айрагтай хотуудын чансааг Женева хот толгойллоо гэж нисэхийн тасалбарын үйлчилгээ явуулдаг Go Europe компани мэдээлэв.

Beer Price Index судалгааны явцад экспортын таван алдартай шар айргийн үнийг харьцуулан үзжээ. Мөн дэлхийн 75 хотод нутгийн нэг маркийн шар айрагны үнийг судалгаанд оруулсан байна. Энэ чансааг Женева, Гонконг, Тель-Авив хотууд тэргүүлэв. Дэлгүүр, баарны шар айргийн үнийн дундажаар, Женева хотын бааранд шар айраг $6,32–10,77 доллараар, дэлгүүрт $1,87 доллараар зарагдаж байна. Хамгийн хямд шар айргийг Польшийн Краков хотод зардаг бөгөөд дундаж үнэ нь 1,66 доллар гэнэ.

Еврокомисс Грект туслах гурав дахь хөтөлбөрөө дэмжлээ

Грект санхүүгийн тусламж үзүүлэх гурав дахь багц арга хэмжээний хөтөлбөрийг Еврокомисс дэмжлээ гэж Reuters мэдээлж байна.

Брюссельд зургаан цагийн турш хуралдсан бүлгийн ээлжит бус хуралдаанаар тэр төлөвлөгөөг дэмжжээ. Бельгийн Сангийн сайд Йохан ван Овертвельдт хэлснээр, талууд харилцан ойлголцлын тунхагт гарын үсэг зуржээ. Грект туслах энэ хөтөлбөрийн эцсийн улс төрийн тохиролцоог евро бүсийн орнуудын Эдийн засаг ба Сангийн сайд нарын уулзалтаар хийх юм.

Нью-Йоркт Японыг ялсаны ойг тэмдэглэв

1945 оны наймдугаар сарын 14-нд Япон бууж өгсөн мэдээ аван Нью-Йоркийн гудамжинд тэмдэглэж байсан өдрин алдартай зурагт буугдсан үнсэлтийг давтахаар далан жилийн дараа хэдэн зуун хосууд хотын гудамжинд гарлаа. Японыг ялсан ойг ийнхүү тэмдэглэсэн хүмүүс яг тэр зургийн баатрууд шиг хувцаслаж, яг тэдэн шиг байрлалтайгаар үнсэлцжээ. Энэ өдөр хотын талбайд Альфред Эйзенштадтын зурагт буусан домогт хосын асар том баримлыг босгосон байна. 1945 оны тэр өдөр Японы эзэн хаан Хирохита дайнд буун өгснөө зарлаж байхад Нью-Йоркийн гудамжинд хоёр сая хүн цугларсан байв.

Бэлтгэсэн Ш.МЯГМАР