Монгол банкны Зээлийн мэдээллийн сантай 680 орчим аж ахуйн нэгж байгууллага хамтран ажиллах гэрээг байгуулжээ. Тухайлбал, банк, банк бус санхүүгийн байгууллага, хадгаламж зээлийн хоршоо, даатгал, утасны оператор компаниуд, Засгийн газрын харьяа яамд мэдээллээ нийлүүлж, хэрэглэж байна.

Сүүлийн үед нийгмийн сүлжээний хэрэгслээр иргэд тог цахилгааны мөнгөө хугацаанд нь төлөөгүй бол чанаргүй зээлдэгчийн ангилалд багтаж Монгол банкны зээлийн мэдээллийн санд бүртгэгдэнэ гэх мэдээлэл гарах болсон.

Монгол банкны Зээлийн мэдээллийн албаны дарга С.Ганбаяраас  дээрх асуултыг тодруулахад тэрбээр "Одоогийн байдлаар Улаанбаатар цахилгаан түгээх сүлжээ компани Монгол банктай албан ёсны хамтын ажиллагааны гэрээ байгуулаагүй. Мэдээлэл нийлүүлж, лавлагаа авдаггүй тул зээлийн мэдээллийн санд тог цахилгааны төлбөрийн мэдээлэл нийлүүлэгддэггүй" гэсэн юм.

Тэгэхээр дээрх мэдээлэл цуурхал гэдгийг албаны хүн баталлаа.