3,415.19
Ойн салбарын 95 жилийн ойн хүрээнд зохион байгуулагдаж байгаа Ойн анги, Ойн нэгж, Ойн мэргэжлийн байгууллагуудын нэгдсэн зөвлөгөөн, чадавхжуулах сургалт эхэллээ. Гурван өдөр үргэлжлэх тус сургалтыг Байгаль орчин, аялал жуулчлалын яамны Ойн бодлого зохицуулалтын газраас зохион байгуулж байна. Тус зөвлөгөөнд 21 аймгийн төлөөллүүд оролцож хууль бус мод бэлтгэл болон ойн хөнөөлт шавж, ой ашиглалт, ойн дагалдах баялаг, мод үржүүлэг, ойжуулах ойг нөхөн сэргээх, ойн нөөц зэрэг сэдвүүдээр бие биенээсээ туршлага судалж байгаа аж.
“Ойн ашиглалттай холбоотойгоор хууль бус мод бэлтгэлийн асуудал яригддаг. Хууль бус мод бэлтгэлтэй тэмцэх чиглэлийн бодлого, ойн ангиудын идэвхтэй оролцооны үр дүнд хууль бус мод бэлтгэл жилээс жилд буурч байгааг зөвлөгөөний үеэр ойн салбарынхан онцолж байлаа.
Ойн сан бүхий аймгуудад ойгоо нөхөн сэргээх зорилгоор мод үржүүлгийн үйл ажиллагаа эрхэлж байна. Энэ нь үр дүнгээ өгч судалгаагаар тогтоогдсон манай орны ой хөгширсөн гэх дүгнэлтийг өөрчлөх эрчимтэй ажил болж буйг орон нутгийн оролцогчид хэлж байв.
Түүнчлэн ойн салбарын хүний нөөц, мэргэжилтэн боловсон хүчний дутмаг байдал болон хууль эрхзүйн орчин, тулгамдаж буй асуудал гээд салбарын асуудлыг тэд 3 өдөр хэлэлцэх юм.
Ойн анги, байгууллагын ажилтнуудыг онол, практик хослуулан чадавхжуулах нь нэн тэргүүний шаардлага болсон гэдгийг зөвлөгөөний үеэр БОАЖЯ-ны Ойн бодлого зохицуулалтын газрын дарга Б.Оюунсанаа хэлж байлаа. Энэ ч үүднээс ойн салбарын тэр дундаа Ойн ангиудын мэргэжилтнүүдийн дунд энэ жилээс эхлэн ур чадварын тэмцээнийг зохион байгуулж эхэлсэн гэдгийг онцолж байсан юм.
Холбоотой мэдээ