Орчин үеийн залууст сошиалаар дамжуулан эерэг мэдээллийг түгээдэг блог хөтлөгч бүжигчин хос бол Jason&Jayel буюу Ш.Билэгсайхан, Б.Оюунномин нар юм. Тэд “Youtube”-ын хамгийн олон дагагчтай сувгийн шагнал болох “Silver Play Button” шагналын эзэд болжээ.

Тэд одоо “Youtube” хаягтаа 140 мянган дагагчтай. Авьяаслаг бүжигчин хос хоёулаа “116” бүжгийн хамтлагийн бүжигчин бөгөөд хамтлагаараа 2018 онд “Авьяаслаг монголчууд” шоунд амжилттай оролцож, финалын шат хүртэл явсан билээ. Бүжигчин хосын блогийг ихэвчлэн өсвөр насны хүүхдүүд үздэг.

Дүрс бичлэгийн хамгийн том сан болох “Youtube” 100 мянган дагагч хүрсэн сувгуудад мөнгөн товч, нэг сая хүрсэн сувгуудад алтан товч, 10 сая дагагчтай сувгуудад алмазан товч бэлэглэж урамшуулдаг. Монгол Улсаас хамгийн анхны мөнгөн буюу 100 мянган дагагчтай болсон сувгаар  2017 онд хошин шог, урлагаар сувгаа хөгжүүлдэг “iNeeMTGiiZaluu” гэх суваг шагнуулж байжээ.

А.СҮРЭН