“Найрамдал” олон улсын хүүхдийн зуслангийн эзэмшил газарт олгосон хууль бус газрын зөвшөөрлийг цуцалж, барилгыг нь буулгах шийдвэрийг Засгийн газрын хуралдаанаар өнгөрөгч тавдугаар сарын 29-нд гаргасан. Тэгвэл өнөөдөр /2019.09.20/ нийслэлийн Газар зохион байгуулалтын албанаас “Найрамдал” зусланд газар олгосон хууль бус 24 захирамжийг хүчингүй болгосон талаар мэдээлэл хийлээ.

69 ГАЗРЫГ НМХГ-Т ХЯНАЛТ ШАЛГАЛТ ХИЙЛГҮҮЛЭХЭЭР ШИЛЖҮҮЛСЭН

Энэ үеэр тус албаны Газар ашиглалтын бүртгэлийн хэлтсийн дарга Д.Бат-Өлзий мэдээлэхдээ “Найрамдал” олон улсын хүүхдийн зуслангийн хашаанд иргэн, аж ахуйн нэгжүүдэд хууль бусаар газар олгосныг судалж үзсэн. Тухайн зуслангийн хашаан дотор газар эзэмших зөвшөөрөл авснаас хойш газраа огт ашиглаагүй, үйл ажиллагаа явуулаагүй 24 байршлын газар эзэмших гэрчилгээ, захирамжийг нь  эхний ээлжинд хүчингүй болголоо. Энэ талаарх захирамжийг Ulaanbaatar.mn вэб сайтад нээлттэй олон нийтэд мэдээлсэн байгаа. “Найрамдал” зуслангийн газрыг улсын тусгай хэрэгцээгээр Засгийн газрын тогтоолоор эзэмшиж авсан байдаг. Өнөөдрийн цуцалж буй газрын хэмжээ нийт талбайн 10 хувьд хүрэхээргүй хэмжээнд байгаа. Мөн үлдсэн газруудад судалгааг явуулж байна. Зарим иргэн, аж ахуйн нэгжийн хувьд барилга байгууламж барьсан, өөр хүний нэр дээр шилжүүлсэн тохиолдол гарч байна. “Найрамдал” олон улсын хүүхдийн зуслангийн эзэмшил газарт олгосон хууль бус газрын зөвшөөрлийг цуцлах асуудал дээр эхний ээлжинд 103 газрыг судалж үзсэн. Үүнээс 69 газрыг нийслэлийн Мэргэжлийн хяналтын газарт хяналт шалгалт хийлгүүлэхээр шилжүүлсэн. Ингэснээр тухайн 24 иргэн, аж ахуйн нэгж хохирол нэхэмжлэхээс гадна газар эзэмших эрхийн гэрчилгээг хууль бусаар цуцалж байна гэдэг гомдлыг шүүхэд гаргаж байгаа гэх мэдээлэл ирсэн” гэдгийг хэлж байв.

Мөн тэрбээр “Найрамдал” олон улсын хүүхдийн зуслангийн эзэмшлийн газарт яагаад хууль бусаар газар олгосон гэж үзэж байна вэ? гэдэг асуултад хариулахдаа “Найрамдал”  бол олон улсын хүүхдийн зуслан учраас Засгийн газрын тогтоолоор эзэмшил газрын талбайн зөвшөөрлийг өгсөн байдаг. Гэтэл Засгийн газрын тогтоолоор авсан хилийн цэсийг Газрын мэдээллийн санд бүртгэх ёстой. Тэр ажлыг хийгээгүйгээс тус зуслангийн хашаан дотор газар хууль бусаар олгосон гэсэн үг” гэв. Цахим орчинд цацагдаад байсан 103 иргэн, аж ахуйн нэгжийн мэдээлэл нь үнэн гэдгийг тус албаны мэргэжилтнүүд хэлсэн юм.

"103 ИРГЭН, АЖ АХУЙН НЭГЖИЙН ЖАГСААЛТ НЬ ҮНЭН"

Цахим орчинд цацагдаад байсан 103 иргэн, аж ахуйн нэгжийн мэдээлэл нь үнэн гэдгийг тус албаны мэргэжилтнүүд хэлсэн юм. Энэ талаар тус албаны мэргэжилтэн тайлбарлахдаа “Нийслэлийн Газар зохион байгуулалтын нийслэлийн Газрын мэдээллийн нэгдсэн сан гэж бий. Энэ сан нь Газар зохион байгуулалт, геодези, зураг зүйн газар дээр төвлөрдөг. Улсын хэмжээнд тухайн иргэний газрын гэрээ гэрчилгээ бичигдэхийн өмнө заавал тэр нэгдсэн санд бүртгэсэн байх ёстой. Бидний зүгээс Газрын мэдээллийн нэгдсэн сангаас түүвэрчилсэн, мөн архивын баримтуудыг гаргаж үзсэний үндсэн дээр тэр жагсаалтыг гаргасан. Тэр дунд улстөрчид  ч бий нэр бүхий тамирчид ч байгаа. Өөрөөр хэлбэл тэр жагсаалт үнэн зөв гэж хэлж болно” гэсэн юм.

Нийслэлийн хэмжээнд газар чөлөөлөлтийн ажлын хүрээнд 263 байршилд 449 обьект чөлөөлжээ. Үүнд хашаа хайс 346,  өргөтгөл найм, ТҮЦ 32, тоосгон гараж, контейнер 63-ыг буулгасан. Мөн хорооллын дундах авто замын 87 байршилд орц, гарц нээгдэж, нийтийн эзэмшлийн 31 байршлын 4151метр.кв газар, явган хүний хаасан 56 байршилд 10189 метр.кв талбайг чөлөөлсөн талаар албаныхан танилцууллаа.

Мөн энэ үеэр сургууль, цэцэрлэг, эмнэлгийн эзэмшлийн газарт хууль бусаар газар олгосон зөрчлийг арилгасан байна. Энэ ажлын хүрээнд 105 сургууль, 154 цэцэрлэг, 44 эмнэлгийн эзэмшил газарт судалгаа хийжээ. Судалж үзэхэд нийт 45 байгууллагын эзэмшлийн газраас хасч, хууль бусаар газар олгосон зөрчлийг илрүүлэн арга хэмжээ авчээ.

А.СҮРЭН

Нийслэлийн  Засаг  даргын  2019 оны

09 дүгээр сарын 05-ны өдрийн

А/902 дугаар захирамжийн хавсралт

ГАЗАР ЭЗЭМШИХ ЭРХИЙГ ХҮЧИНГҮЙ БОЛГОСОН ИРГЭН,

АЖ АХУЙН НЭГЖҮҮДИЙН ЖАГСААЛТ