Дэлхийн улс орнууд хуванцар хог хаягдалтайгаа янз бүрийн аргаар тэмцэж байна. Саяхан л гэхэд Италийн Ром хотноо 30 ширхэг хуванцар саваар нийтийн тээврээр зорчих 1,5 еврогийн үнэтэй тасалбар авах эрхийг ард иргэддээ олгож эхэлсэн талаар мэдээлэл гараад байсан билээ.

Хуванцар хог хаягдлыг ашигтайгаар зохицуулж, хог хаягдлаасаа салах арга эрэлхийлж буй улсуудын бас нэг жишээ нь Филиппин улс юм. Тус улсын байгаль орчныг хамгаалагчид нэн ядуу өрхүүдэд чиглэсэн хуванцар хаягдлыг цагаан будаагаар солих аян эхлүүлсэн тухай "Reuters" агентлаг мэдээлжээ.

Уг мэдээлэлд дурдсанаар иргэд хоёр кг хуванцар хаягдал тутамд нэг кг цагаан будаа авах боломжтой аж. Филиппинд нэг кг цагаан будаа 70 цент орчим үнэтэй байдаг. Зөвхөн хуванцар түүгээд ийм хэмжээний будаа авна гэдэг бол тус улсын ядуусын хувьд маш олзуурхууштай үйл ажиллагаа болж байгаа учир иргэд идэвхтэй оролцох байх гэж найдаж байгаа гэнэ.

Эх сурвалж: REUTERS