“Ялагчдын цуваа-Улаанбаатар” олон улсын фестиваль таван өдөр үргэлжилнэ

“Ялагчдын цуваа-Улаанбаатар” олон улсын нэг хүний жүжгийн фестиваль энэ сарын 19- 23-ны хооронд “49 дүгээр гудамж” Хүүхэд залуусын театрт таван өдрийн турш болох юм байна.

Уралдааны шүүгчээр Хятад улсын Бээжингийн их сургуулийн багш, кино, театр урлаг судлалын доктор, зохиолч Тиан Хуй Чүн, Испани улсын урлаг, утга зохиол судлаач Andres Bigorra Mir, Монгол Улсаас найруулагч Мягмарнарангийн Батболд нар ажиллах ажээ.

Уг наадамд өнгөрсөн хугацаанд ЮНЕСКО-гийн дэргэдэх Олон улсын театр урлагийн институтээс томилогдсон Олон улсын нэр хүндтэй шүүгчид, Монгол, Герман, АНУ, БНСУ, ОХУ, Литви, Киргиз Польш, Израль, ОХУ-ын Хакасс, Тува, Саха-Якут, Буриад зэрэг улсын шилдэг жүжигчид оролцсон бол энэ жил ч мөн олон улсын алдартай уран бүтээлчид хүрэлцэн ирэх нь.

Тус наадам нь 2017 оноос ЮНЕСКО-гийн дэргэдэх Олон улсын театр урлагийн институтэд албан ёсоор бүртгэгдсэнээр уралдаант наадам болон өргөжжээ. 2017 онд Польшийн жүжигчин Камила Каминска “Кармазовын бүсгүйчүүд” жүжгээр, 2018 онд АНУ-ын жүжигчин Бремнер Дути “Cabaret 33” жүжгээрээ тус тус Гранпри шагналын эзэн болсон байна.

Энэ жилийн наадмын онцлог нь шилдэг найруулагчид шагнал гардуулахад оршиж буй аж. Монгол Улсын Урлагийн гавьяат зүтгэлтэн, найруулагч Б.Баатар агсны үр хүүхэд, гэр бүл, шавь нарын санаачилгаар байгуулагдсан “Баатар” сан таван өдрийн турш хөндлөнгийн шүүгчээр оролцож, шилдэг найруулга бүхий бүтээлд шилдэг найруулагчийн анхны шагналаа гардуулах юм байна.

Сонирхуулахад, Монголын Моно жүжгийн төв нь “Ялагчдын цуваа-Улаанбаатар” Олон улсын нэг хүний жүжгийн фестивалийг 2015 оноос амжилттай зохион байгуулж ирсэн юм. Дэлхий нийтэд хүчээ авч байгаа энэхүү нэг хүний жүжгийн урсгал нь уран бүтээлчдэд маш бага зардлаар дэлхийн тавцанд өрсөлдөж ур чадвараа ахиулах боломжийг олгодог гэдгээрээ онцлог юм.

“Ялагчдын цуваа-Улаанбаатар” нэг хүний жүжгийн олон улсын фестивальд оролцох уран бүтээлчдийн нэрс