Монголын жүдо бөхийн холбооны Гүйцэтгэх захирал М.Бөхбат, Монголын жүдо бөхийн шигшээ багийн Ерөнхий дасгалжуулагч, Хөдөлмөрийн баатар, Ардын багш, Гавьяат тамирчин О.Балжинням нарын бусад дасгалжуулагчид ажлаа өгөхөө өчигдөр /2019.09.12/ албан ёсоор мэдэгдсэн билээ. Японд болсон ДАШТ-ээс нэг хүрэл медальтай ирсэн шигшээ багийн дасгалжуулагч нар ийнхүү ажлаа өгөх шийдвэрийг гаргажээ. Өнөөдрөөс эхлэн шигшээ багт ажиллах дасгалжуулагчаар Хөдөлмөрийн баатар Х.Цагаанбаатар, Гавьяат дасгалжуулагч Х.Болдбаатар болон Гавьяат тамирчин С.Ням-Очир, Азийн наадмын аварга Д.Нямхүү нарын олон тамирчин, багш яригдаж байна.

Холбооны дотоод уур амьсгалыг олон түмэнд дэлгэж, шигшээ багийн дасгалжуулагчийн сонгон шалгаруулалтын дүнг мэдээлж байсан Х.Цагаанбаатар байнга олны анхааралд байдаг. Тэрбээр сүүлийн жилүүдэд Монголын пара жүдо бөхийн холбооны ерөнхийлөгчөөр ажиллаж байгаа билээ. Өнгөрөгч сард Японд болсон ДАШТ-ийг шууд дамжуулан хүргэж байсан Х.Цагаанбаатар багшаар ажиллахаар болжээ.

Өнөөдрөөс эхлэн “Мон-Алтиус Цагаанбаатар” академи үйл ажиллагаагаа эхлүүлж, жүдо бөхөөр хичээллэхийг хүссэн хүүхдийг бүртгэж авахаар болсон байна. Энэхүү академид Хөдөлмөрийн баатар, Гавьяат тамирчин Х.Цагаанбаатараас гадна ОУХМ Ч.Болдбаатар, С.Баяртүвшин нар багшлах юм байна.

Жүдо бөхийн шигшээ багийн дасгалжуулагч нар ажлаа өгөхөө мэдэгдсэн энэ үед Х.Цагаанбаатарын энэхүү мэдээлэл ч олны анхааралд өртлөө. Шигшээ багт дуудагдах магадлал өндөр Х.Цагаанбаатар есдүгээр сарын 30-аас эхлэн “Мон-Алтиус Цагаанбаатар” Академид багшлахаар болсноо ийнхүү мэдэгдлээ.

Одоогоор Монголын жүдо бөхийн холбооноос ямар нэгэн мэдээлэл өгөөгүй байна.