Монголын дрифт сонирхогчдын “Starter’s Drift Series” тэмцээн амжилттай зохион байгууллагдлаа.

Монголын Дрифтийн Холбооноос “Starter’s Drift Series” дрифт сонирхогчдын тэмцээнийг  2015/08/02-ны өдөр амжилттай зохион байгууллагдлаа. Энэ удаагийн тэмцээн нь ҮСАХүрээлэнгийн “Go Karting Circiut” зам дээр зохион байгууллагдсан бөгөөд нийт 50 орчим тамирчин оролцсоноос 30 гаран тамирчид нь анх удаа тэмцээнд оролцож байгаа тамирчид байсан нь дрифтийн спортын хөгжил, энэ спортыг сонирхогч залуусын тоо нэмэгдэж байгааг илтгэж байна. Монголын Дрифтийн Холбооноос цаашид зохион байгуулах тэмцээн уралдааныг Мэргэжлийн /Mongolian Drift Series/ болон Сонирхогчдын /Starter’s Drift Series/ гэж 2 тусдаа зохион байгуулах бөгөөд Мэргэжлийн /MDS/ тэмцээнд 2012 оноос хойш шагналт байранд орж байсан тамирчид 32-ийн дүрмээр хоорондоо өрсөлдөх бол Сонирхогчдын /SDS/ тэмцээнд урьд өмнө тэмцээнд оролцож байсан болон шинэ залуу тамирчид оролцож ур чадвар, хурд хүчээ сорин өрсөлдөх  бөгөөд цувралын хамгийн өндөр оноотой тамирчид MDS-д оролцож Мэргэжлийн тамирчидтай хурд хүчээ сорих боломжийг олгох аж. Монголын Дрифтийн Холбоо нь өмнө Монголын Мэргэжлийн Спорт Автомашины Холбоо гэсэн нэрээр үйл ажиллагаа явуулж байсан бөгөөд өнгөрсөн 6 сард хоёр холбоо нэгдэж Монголын Дрифтийн Холбоо нэрээр цаашдийн үйл ажиллагаагаа явуулж байгаа билээ.

Сонирхогчдын анхдугаар тэмцээн SDS нь 3 үеэр зохион байгууллагдсан ба тэргүүн байрыг iDrift клубын тамирчин Б.Батмөнх, дэд байрыг JZX Mongolia клубын тамирчин Б.Бямбадорж, гуравдугаар байрыг Blackteam клубын тамирчин  Ж.Батбаяр  нар тус тус эзэллээ. Тэмцээний бас нэгэн онцлог нь тамирчдад эмчийн үзлэг болон техникийн үзлэг хийж тэмцээнд оруулсан ба зохион байгуулалт болон үзэгчдийн аюулгүй байдлыг дээд зэргээр хангасан бөгөөд BMX Street Extrem үзүүлбэрүүд нь үзэгчдийг гайхшруулж байлаа. Дрифтийн спорт сонирхогч залуусдаа дуулгахад дараагийн тэмцээн 2015/08/22-ны өдөр ҮСАХүрээлэнд дахин зохион байгууллагдах гэнэ.

Та бүхэнд тэмцээний зурагнуудаас хүргэж байна.