Баянзүрх дүүргийн нутаг дэвсгэрт өнгөрөгч сарын 30-ны өдрийн 17:05 цагт нэг эрэгтэй, нэг эмэгтэй хүн хар тамхи хэтрүүлсэн байдалтай нас барсан хэрэг гарсан талаар бид мэдээлсэн. Уг хэргийн дуудлага мэдээллийг тус оршин суугчид өгсөн бөгөөд амиа алдсан иргэд амьсгал хураагаад олон цаг болсон байжээ.

Хэргийг тодруулбал, Баянзүрх дүүрэгт оршин суух хаягтай эрэгтэй 29 настай Ч болон эмэгтэй 27 настай О нар нь мансууруулах төрлийн бодис хэтрүүлэн хэрэглэн хордлогод орсон байдалтай нас баржээ. Урьдчилсан байдлаар тэднийг гаднын нөлөөгүй амиа алдсан байж болзошгүй байна. Хэргийн газраас эд мөрийн баримтаар мөнгөн дэвсгэр гурван ширхэг, тунгалаг шингэн 100г, хар өнгийн нунтаг бодис зэргийг хураан авсан юм байна.  Тэгвэл дээрх хэргийн хохирогчдыг ямар байдалтай нас барсан зэрэг хэргийн газрын бичлэгийг ЦЕГ-аас олон нийтэд хар тамхины хор хөнөөлийг таниулах зорилгоор ил болгосон байна.