Катар-2022 хөлбөмбөгийн ДАШТ-ий урьдчилсан шатны тоглолтууд үргэлжилж байгаа. Монгол Улсын шигшээ баг Катар-2022 хөлбөмбөгийн ДАШТ-ий урьдчилсан шатны Азийн бүсийн I шатыг амжилттай давж II шатанд шалгарсан.

Монгол Улсын шигшээ баг түүхэндээ анх удаагаа хөлбөмбөгийн ДАШТ-ий сонгон шалгаруулалтын II шатанд шалгараад байгаа бөгөөд Азийн бүсийн II шатанд Япон, Киргизстан, Тажикстан болон Мьянмар улсын шигшээ багуудтай F хэсэгт багтсан. Тэмцээний сонгон шалгаруулалтын II шатанд шалгараад байгаа Монгол Улсын шигшээ баг маргааш 17.00 цагт талбайдаа Мянмар улсын шигшээ багтай тоглоно. Өнөөдөр тэмцээний өмнөх хэвлэлийн бага хурал “Holyday Inn” зочид буудлын хурлын танхимд боллоо.

Монгол Улсын хөлбөмбөгийн шигшээ баг наймдугаар сарын 31 хүртэл 15 хоногийн хугацаанд Унгар улсад бэлтгэл хийгээд ирсэн. Энэ удаагийн шигшээ багийн бүрэлдэхүүнд хэд хэдэн залуу тоглогчдыг шинээр дуудсан. Тэмцээний өмнө Монгол Улсын хөлбөмбөгийн шигшээ багийн дасгалжуулагч Герман мэргэжилтэн М.Вайс хэлэхдээ “шигшээ багтаа залуу тоглогчиддоо боломж олгож байгаа. Ер нь шинэ, залуу тоглогчдыг гаргах зорилготой ажиллаж байна. Мьянмарын шигшээ баг бол сул өрсөлдөгч биш. Бид талбайдаа тоглож байгаа нь давуу тал болно” гэжээ. Харин Монголын шигшээ багтай өрсөлдөх Мьянмар улсын шигшээ багийн дасгалжуулагч Монтенегро мэргэжилтэн М.Радулович “бидний хувьд цаг уур, цагийн зөрүү болон хиймэл зүлгэн дээр тоглох нь хүндрэлтэй байгаа6. Гэсэн хэдий ч бид эерэг үр дүн авна гэдэгтээ итгэлтэй байна” хэмээн ярьжээ. Мьянмарын шигшээ багийн дасгалжуулагч М.Радулович ажлаа аваад ердөө 2 дахь тоглолтондоо оролцох гэж байгаа нь энэ ажээ.

Мьянмар улсын шигшээ багийн эсрэг тоглолтонд оролцох шигшээ багийн бүрэлдэхүүн:

• Хаалгач: А.Сайханчулуун (Улаанбаатар), Э.Мөнх-Эрдэнэ (Атлетик220), Б.Ариунболд (Эрчим)
• Хамгаалагч: Д.Төрбат (Атлетик220), Н.Цэдэнбал (Улаанбаатар Сити), Б.Даваажав, Г.Билгүүн (хоёулаа Эрчим), О.Мөнх-Оргил, А.Дөлгөөн (Дэрэн), С.Өсөхбаяр (Улаанбаатар)
• Хагас хамгаалагч: С.Ганхуяг, Ж.Сүндорж, Д.Тэмүүлэн (бүгдээрээ Хангарьд), Х.Цэнд-Аюуш, М.Жансерик (хоёулаа Дэрэн), Б.Төгсбилэг, А.Нармандах (хоёулаа Улаанбаатар Сити), П.Энхбилэг (Андууд Сити), Б.Балжинням (Улаанбаатар)
• Довтлогч: Н.Наранболд (Атлетик220), Ц.Энхтөр (Эрчим), О.Мижиддорж (Улаанбаатар Сити), Э.Мөнгөнбагана (Андууд Сити)

Б.БЯМБАБАЯР