Хонгконгод оюутан сурагчид хичээл хаялт зарлав

Эх газрын Хятад руу хэрэгтэн шилжүүлэх хуулийн төслийг эсэргүүцсэн Хонгконгчуудын тэмцэл үргэлжилсээр байна. Хонгконгийн 200 гаруй сургуулийн 9,000 гаруй оюутан сурагч өнөөдөр /2019.09.02/ хичээлдээ суулгүй эсэргүүцлээ илэрхийлжээ.

Тэд мягмар гаригийг /2019.09.03/ дуустал хичээл хаяж, цаашдаа долоо хоног бүр нэг өдрийг эсэргүүцлийн өдөр болгохоор шийдсэн байна.

Сурагчид сургуулийнхаа гадна талбайд гар гараасаа атгалцан өвдөглөж суугаад нэгэн дуугаар эсэргүүцлээ илэрхийлж байгаа ба тэд олон долоо хоног тэмцэж буй тэмцэгчдийг зүгээр хараад сууж чадахгүй хамтдаа тэмцэхээр болсон нь энэ аж. Мөн тэд дүрэмт хувцсан дээрээ жагсагчдын нэгэн адил хамгаалалтын дуулга, шил, амны хаалт зүүжээ.

Хонгконгийн хамгийн анхны коллежуудын нэг "Queen’s College"-ийн оюутнууд сургуулийн сүлд дуугаа дуулахаас өмнө "Хонгконгийг чөлөөл!" хэмээн хашгирч, сургуулийн гадна байрладаг Хятадын анхны Ерөнхийлөгч Сунь Ятсений хөшөөнд тэмцэгчидтэй адил хамгаалалтын дуулга, амны хаалт, бээлий өмсгөж, зүүлгэсэн байна.