ОХУ-ын Агаар-сансрын хүчний гвардын 234-р нисэх хорооны “Русские Витязи” багийн Су-30СМ сөнөөгч онгоцнууд Даваа гариг (2019.08.26)-т “Чингис хаан” Олон улсын нисэх буудалд газардав.

Өндөр ур чадвартай нисгэгчдээс бүрдсэн тус багийнхан Халх голын дайны ялалтын 80 жилийн ойг тохиолдуулан энэ сарын 28-ны өдөр 12:00-14:00 цагт Хүй долоон худагт нисэхийн үзүүлбэр үзүүлэх юм.

Оросын нисэх хүчний харьяа агаарын үзүүлбэрийн “Русские Витязи” буюу “Оросын Баатрууд” баг нь анх 1991 онд Москва хотын ойролцоох “Кубинка” агаарын баазад 6 ширхэг “Су-27” онгоцтой байгуулагджээ. 1991 онд анхны үзүүлбэрээ Англи улсад Лукарсын агаарын шоу дээр үзүүлж, гараагаа эхэлж, АНУ-д хоёр ч удаа очиж байсан аж.

Дэлхийн олон улс оронд очиж үзүүлбэрээ үзүүлсээр байгаа тус багийнхан парк шинэчлэлтийн хүрээнд 2016 онд хуучин “Су-27” сөнөөгч онгоцуудаа цоо шинэ “Су-30СМ” сөнөөгч онгоцоор сольжээ.

Дашрамд дурдахад, баярын үйл ажиллагаатай холбогдуулан Офицеруудын ордон, Таван шар, Төв цэнгэлдэх хүрээлэнгийн урдаас Хүй долоон худаг руу нийтийн тээвэр үйлчлэх юм.

Б.ЖАРГАЛ