Үндсэн хуульд оруулах нэмэлт, өөрчлөлтийн төслийг хоёр, гурав дахь хэлэлцүүлэгт бэлтгэх үүрэг бүхий Ажлын хэсэг үдээс өмнө хуралдсан.  Ажлын хэсгийн хуралдаанаар Улсын Их Хурлын 2019 оны 72 дугаар тогтоолоор байгуулагдсан зөвшилцлийн Ажлын хэсгээс Монгол Улсын Үндсэн хуульд оруулах нэмэлт, өөрчлөлтийн төсөл, саналтай холбогдуулан зарчмын зөрүүтэй 35 саналын томьёоллоор санал хураалт явуулахад хуралдаанд оролцсон гишүүдийн олонх нь дэмжсэн.

Ажлын хэсгээс гаргасан төслийн талаарх зарчмын зөрүүтэй саналын томьёоллуудыг Төрийн байгуулалтын байнгын хорооны  хуралдаанаараа хэлэлцэн санал хураалт явуулж шийдвэрлэх юм.

УИХ дахь МАН-ын бүлэг өчигдөр /2019.08.23 /хуралдаж, Ерөнхийлөгчийн өргөн барьсан Үндсэн хуульд нэмэлт, өөрчлөлт оруулах хуулийн төслөөс зарим саналуудыг нь хүлээн авч зөвшилцсөн билээ. Тухайлбал, УИХ-ын гишүүдийн тоог 108 байхаар оруулж ирсэн Ерөнхийлөгчийн саналыг дундын хувилбараар буюу 99 гишүүнтэй, парламентын бүрэн эрхийн хугацаа таван жил байхыг дэмжсэн.

Харин УИХ дахь АН-ын зөвлөлийн хувьд гишүүдийн тоог 99 болгож, тогтолцоог тодорхойгүй оруулж ирж буйг Ардчилсан нам хүлээж авахгүй гэдгээ хэвлэлийн хурал хийж мэдэгдсэн билээ.