Энэ сарын 4-нд эхэлсэн “Сонирхогчдын УАШТ” өнөөдөр өндөрлөж медалийн эздээ тодрууллаа. Шилдэг 30 баг өрсөлдсөн энэхүү тэмцээний хүрэл медалийн төлөө “Арвис” болон “Хангарьд Сити” багууд тоглосон. Тоглолт ч өгөө аваатай хурдан темптэй өрнөсөн бөгөөд 2:1 харьцаатай тэргүүлж явсан “Арвис” богино хугацаанд 2 ч хүний дутуутай болсоноор байдал эвгүйтсэн. Улмаар “Хангарьд Сити” тоглолтыг тэнцүүлж багууд торгуулийн цохилтоор ялагчийг шийдвэрлэхээр болсон юм. Хариуцлагатай эгзэгтэй энэ үед “Хангарьд Сити” багийн хаалгач 2 ч  чухал хаалтыг хийснээр ийнхүү 2015 оны Сонирхогчдын УАШТ-ээс хүрэл медалийг энгэртээ зүүлээ.

"Дэлхийн Зөн Монгол" ОУ-ын байгуулага тус тэмцээнийг дэмжин хамтран оролцож байна.

Хүсэн хүлээсэн шигшээ тоглолт эхлэж “Баянгол ФС” болон “Хилчин” багийн хөгжөөн дэмжигчид багаа уухайлан дэмжсээр тоглолтыг эхлүүллээ. Эхний хагасд аль аль багуудын хувьд эрчимтэй тоглолтыг үзүүлсэн. Тооны харьцаа өөрчлөгдөх олон боломжууд гарсан ч тэнцээгээр өндөрлөсөн. Төгсгөл хэн сайн хийсэн нь энэ жилийн Сонирхогчдын аварга цолыг хүртэх байсан. Хүч тэнцүү багууд нэг л алдаа гарахад тэр нь гоол болдгийн адилаар “Баянгол ФС” өөрсдийн гарсан боломжоо ашигласнаар энэ тоглолтонд өрсөлдөгчөө 2:0 харьцаатай  ялж АВАРГА багаар тодорлоо.

Сонирхогчдын лигийн ¼ шигшээд шалгарсан шилдэг 8 баг мөн давхар 1-р лигт өрсөлдөх эрхээ авж чадлаа. Шагнал гардуулах ёслолын үйл ажиллагаан дээр лигийн шилдгүүдийг тодруулсан. Үүнд:

Шилдэг хаалгач: “Хилчин” Ш.Ган-Эрдэнэ

Шилдэг хамгаалагч: “Баянгол ФС” Г.Бүрэнжаргал

Шилдэг төгс тоглогч: “Хилчин” Б.Цогтбаатар

Шилдэг довтлогч: “Континентал” Ислам Хамхоев

Эх сурвалж: http://the-mff.mn