Нийслэлийн Засаг дарга бөгөөд Улаанбаатар хотын захирагч Э.Бат-Үүлээс цаг үеийн асуудлаар дараах асуултад хариулт авлаа.

-Улаанбаатар хотод өчигдөр бороо ороход үндсэнээ усанд автлаа. 2013 оноос хойш барьсан авто замуудад ус зайлуулах шугам хоолой барьсан ч хуучин зураг төслөөр хийсэн учраас хүчин чадлаа дийлэхгүй байна гэх. Хот цаашдаа энэ асуудлыг ямар байдлаар шийдэх вэ?

-Хуучин зургаар ч барина уу, шинэ зургаар ч барина уу хоолой бол тодорхой хэмжээний ус л зайлуулна. Орж байгаа бороо бидний тооцсоноор орохгүй.

Ган болсноос хөрсөнд ус шингэхгүй үерийн байдалд оруулдаг. Өчигдрийн борооны тухайд, хэтэрхий их газар хатаад ус шингээх чадвараа алдсан үед орсон. Бүхэлдээ ус асгаж байгаа юм шиг орсон. Энийг бол ямар ч ус зайлуулах байгууламж зайлуулж чадахгүй.

-Энэ жилийн бүтээн байгуулалтын ажил хэр урагшилж байна вэ. Цаг хугацаандаа багтаж чадаж байгаа юу?

-Энэ жил чамгүй том бүтээн байгуулалтын ажил хийгдэнэ. Хотын захирагчийн хувьд нийслэлийнхээ иргэдэд асуудлаа ойлгуулж, тодорхой арга хэмжээ авч ажиллана. Бүтээн байгуулалтын ажил хуваарийн дагуу хийгдэж байна, олзуурхууштай нь. Жишээ нь Энхтайваны өргөн чөлөөний дагуух дулааны шугам тавих ажлын эхний хэсэг графикт хугацаанаасаа хоёр хоногийн өмнө дууссан. Ер нь ажлуудаа графикт хугацаанаас нь өмнө дуусгахыг хичээж байна. Учир нь бороотой уралдаж ажиллах шаардлага тулгарч байгаа. Бороо орвол ажил хойшлогддог.

Хойд зүгт зуслангийн зам засварын ажил мөн графикийн дагуу үргэлжилж байна. Үндсэндээ зуслангийн бүх замын ажил есдүгээр сарын 15-нээс аравдугаар сарын 1-ний хооронд дуусна.

Бид хойд чиглэлийн зуслангийн иргэдтэй уулзаж, саналыг нь асуух бодолтой байна. Яагаад гэвэл зуслангийн замын ажлын далангийн асфальтон хучилтыг энэ жилдээ хийгээд ирэх жил хөнгөн хучилтаа хийе гэж гуйх гэсэн юм. Ингэснээр зам технологийн дагуу тавигдах боломжтой. Уг нь хугацаандаа багтааж өнгөн хучилтаа хийгээд дуусгаж болох ч чанарын асуудлыг бодолцох хэрэгтэй байна. Эхлээд замын суурийг сайн тавибал маш сайн замтай болно. Хэрвээ иргэд зөвшөөрөхгүй бол замын ажлыг энэ ондоо бүрэн дуусгаж таарна.

-Энхтайваны өргөн чөлөөний дагуу хийж байгаа шугам сүлжээний ажил хэзээ дуусах вэ?

-Энэ ажил наймдугаар сарын 15-нд дуусна. Энхтайваны өргөн чөлөө чөлөөлөгдөнгүүт нийтийн тээврийн шинэ сүлжээ рүү нэвтрэх ажлыг эхлүүлнэ. Өөрөөр хэлбэл 500 төгрөгийн билетээр чөлөөтэй зорчиж бололцоо бүрдэнэ. Ингэхдээ дээд тал нь зорчигч хоёр удаа автобусанд суух боломжтой байхаар. Маршруттай нь уялдуулаад хоёр сүлжих боломжтой байхаар зохицуулалт хийсэн. Бүгд ухаалаг карт руу шилжинэ. Энэ картаар ямар ч тээврийн хэрэгслээр зорчих боломжтой гэсэн үг. Гол нь зорчигч 30 минутын дотор дараагийн тээвэрт шилжин суух ёстой. Харин ахмадууд 50 минутын хугацаанд сүлжиж сууж болохоор зохицуулж байна.

-АСЕМ-ийн бэлтгэлийг хэрхэн хангаж байгаа вэ?

-АСЕМ-ийн зочид төлөөлөгчид зориулсан зочид буудлын ажил графикийн дагуу явж байна. Ирэх аравдугаар сард эхний зочид буудал ашиглалтад орно. Хамгийн сүүлийн хугацаа нь ирэх оны тавдугаар сард ашиглалтад орох юм. Хүрхэрээд баригдаж байгаа хаус хорооллууд улс орны төрийн тэргүүн, дээд хэмжээний зочдод зориулагдсан орон сууцны цогцолбор. АСЕМ-ийн үйл ажиллагаа өндөрлөсний дараа зочид буцна. Бид дарааагаар нь хүн үйлчлүүлдэггүй байртай үлдэж болохгүй. Тийм учраас хувийн хөрөнгө оруулалтаар эдгээр байруудыг барьж байна.

Г.ХОРОЛ