Хонгконгод суугаа Монгол Улсын Ерөнхий Консулын газраас дахин сэрэмжлүүлэг гаргажээ. Тодруулбал, Хонконгийн олон улсын нисэх буудалд даваа гариг /2019.08.12/-т тэмцэгчид эсэргүүцлийн хөдөлгөөн өрнүүлж, бүртгэлийн ажиллагааг саатуулснаас мөн өдрийн үдээс хойшхи бүх нислэг цуцлагдсан.

Тэмцэгчид мягмар гаригт /2019.08.13/ дахин нисэх буудалд орж суултаа үргэлжлүүлж, эмх замбараагүй байдал үүсгэсэн тул цагдаагийн тусгай хүчин 22.00 цагаас эхлэн ажиллагаа явуулж, өчигдөр /2019.08.14/ нисэх буудлын үйл ажиллагааг хэвийн байдалд оруулжээ.

Дээрх үйл явдалтай холбоотойгоор хойшилсон нислэгүүдийг наймдугаар сарын 14-ний өдрөөс дахин хуваарьт оруулж нисгэж эхлээд байна. Тиймээс Монгол Улсаас Хонконгод суугаа иргэддээ хандаж, дараах анхааруулгыг хүргэж байна.

• Нисэх онгоцны буудал руу очихоосоо өмнө нисэхийн вэб сайт руу орж хуваариа нягтлах
• HKG My Flight application-ийг гар утсандаа татаж авч, нислэгийн мэдээлэлтэй танилцах
•  Олон хүн цугласан газраас хол байх

Жагсаал цуглаан зохион байгуулах магадлалтай газар:

• 2019 оны наймдугаар сарын 15-нд Wan Chai,
• 2019 оны наймдугаар сарын 17-нд Central, Admiralty, Hung Hom, Kowloon ,
• 2019 оны наймдугаар сарын 18-нд Causeway Bay, Central,
• 2019 оны наймдугаар сарын 19-нд “MTR Метроны үйл ажиллагааг саатуулах”
• 2019 оны наймдугаар сарын 25-нд Kwai Chung to Tsuen Wan зэрэг дүүрэгт олныг хамарсан жагсаал цуглаан болох магадлалтай байгаа тул энэ өдрүүдэд эдгээр газруудаар аль болох зорчихгүй байх зөвлөж байна. 

А.АНИР