Монгол Улсын Засгийн газрын өнөөдрийн /2019.08.14/ хуралдаанаар сургалтын төлбөрийн зээл чөлөөлөлт болон багц асуудлыг хэлэлцсэн юм. Хуралдаанаас гарсан шийдвэрийн талаар Боловсрол, соёл, шинжлэх ухаан, спортын сайд Ё.Баатарбилэг мэдээлэл хийлээ. 

Тэрбээр "Юуны түрүүнд боловсролын зээлийн сантай холбоотой асуудлууд яригдлаа. Боловсролын зээлийн сангаас дотоод, гадаадын их дээд сургуульд суралцагчид боловсролын зээл олгодог. Энэ асуудлын хүрээнд өнгөрсөн жилээс зээлийн санд шалгалтууд орж холбогдох арга хэмжээг авч  хэрэгжүүлэхийг салбарын сайдад үүрэг өгсний дагуу өнөөдөр хуралдаанаар асуудлуудыг орууллаа.

2004-2016 онд дотоодын их, дээд сургуульд суралцаж төгссөн боловсролын зээлийн сангаас зээл авсан зээлийн гэрээний үүргийг биелүүлсэн иргэдийн зээлийг төрөөс чөлөөлөх шийдвэр гарсан. Дээд боловсролын санхүүжилт суралцагчдын нийгмийн баталгааны  тухай хуульд заасны дагуу  УИХ-д энэ асуудлын журмыг нь өргөн барихаар тогтлоо. Журмыг өргөн барихтай холбоотойгоор боловсролын зээлийн санд хадгалагдаж байгаа 13 мянга гаруй диплом бий.

Тэгэхээр гэрээнийхээ үүргийг биелүүлээд нийгмийн даатгалаа төлж байгаа хүмүүсийн диплом зээлийн сангаас чөлөөлөгдөнө гэсэн үг.  Боловсролын зээлийн сан буюу тухайн үеийн Төрийн сан нь  голч оноогоор төгсвөл бүрэн чөлөөлдөг,  зээл авсан иргэд төгсөөд таван  жилийн турш нийгмийн даатгал төлсөн бол чөлөөлөх үндэслэлтэй байсан. 2008 оноос хойш шинэ журам гарсан тул дээрх журмаар чөлөөлөлт явагдаагүй. Шинэчлэгдсэн журмын дагуу диплом чөлөөлөх тухай асуудлыг УИХ-аар хэлэлцүүлж чөлөөлүүлэх ёстой болсон.

Мөн шинжлэх ухаан технологийн  салбарт авч хэрэгжүүлэх зарим арга хэмжээний тогтоол батлагдсан. 2015 оны Засгийн газрын 27 дугаар тогтоол гарч шинжлэх ухааны байгууллагуудын тоог цөөлж бүтэц орон тоо хийж байгаа нэрийдлээр   чиг үүргийн бус хүрээлэнгүүдийг хооронд нь нэгтгэж  салгаж бужигнуулсан. Үүнтэй холбоотойгоо шинжлэх ухааны байгууллагуудын байшин, савыг нь өөр байгууллагууд руу шилжүүлж шинжлэх ухааны салбарын хэвийн үйл ажиллагааг алдагдуулсан шийдвэр гарсан  байсан. Энэ шийдвэрийг засч залруулах, шинжлэх ухааны салбарыг  хөгжүүлэхэд хэрэглэгдэх төсөв мөнгийг улсын төсөвт суулгах Засгийн газрын тогтоол батлагдлаа. Мөн Шинжлэх ухааны ажилтны улсын анхдугаар зөвлөгөөнийг 2019 оны есдүгээр сард зохион байгуулахаар болсон" гэлээ.

Э.БУРАМ