Дархан-Уул аймгийн Дархан суманд өчигдөр орой 18:23 цагийн орчим аадар бороо орж, 12 айлын гэр, хашаа байшин усанд автсан байна. Тус аймгийн Онцгой байдлын газрын найман алба хаагч гурван автомашинтайгаар 19:20- 22:00 цагийн хооронд үерийн голомтод ажиллаж үерийн усны голдрилыг  өөрчилж, нэг айлын гэрийг аюулгүй газарт нүүлгэн шилжүүлжээ.

Аймгийн хэмжээнд олон хоног үргэлжлэн орсон борооны улмаас Хараа, Ерөө голын ус үерийн төвшнөөс давж аюулын зэрэгт хүрсэн байна. Иймд голын эрэг дагуу суурьшиж, нутаглаж буй малчид, тариаланчид, аж ахуйн нэгж, байгууллага, иргэдийг сонор сэрэмжтэй байж, үер усны аюулаас урьдчилан сэргийлэх арга хэмжээг авах, хот суурин газрын үерийн далангийн ус зайлуулах хоолойгоор ус чөлөөтэй урсах нөхцөл бүрдүүлэхийг аймгийн онцгой байдлын газраас зөвлөж байгаа юм.

Б.ЦЭЦЭГ