АНУ-ын F-22 загварын сөнөөгч хоёр онгоц болон Канадын CF-18 байлдааны хоёр онгоц нь ОХУ-ын “Ту-95” Баавгай (НАТО-гийн нэрлэснээр) алсын зайн бөмбөгдөгч хоёр онгоцыг Аляск, Канадын агаарын довтолгооноос хамгаалах бүс (Аляскийн баруун эргээс 200 миль зайтай) рүү орсных нь дараа саатуулсан байна. Энэ талаар Хойд Америкийн сансрын довтолгооноос хамгаалах цэргийн командлал (NORAD) мэдээлжээ.

ОХУ-ын энэ үйлдэл нь Орос, АНУ-ын харилцаанд түвэгтэй байдал үүсгэж буй аж. АНУ-ын Ерөнхийлөгч Дональд Трамп Москватай харилцаагаа сайжруулахыг хүсч буйгаа тодорхой илэрхийлсэн ч хоёр оронд геополитикийн өргөн хүрээг хамарсан асуудлууд зөрчилдөөн үүсгэсэн хэвээр байгаа юм. Үүнд: Их Британид Оросын тагнуулч асныг хордуулахыг оролдсон, Орос Крымыг бүрэлдэхүүндээ багтаасан, АНУ-ын сонгуульд хөндлөнгөөс оролцсон зэрэг асуудлууд багтжээ.

АНУ-ын албаныхны мэдээлснээр, сүүлийн хэдэн жилд ОХУ-ын бөмбөгдөгч онгоцууд хэд хэдэн удаа тухайн бүс нутагт нэвтэрч байсан бөгөөд АНУ, Канадын онгоцууд саатуулж байсан аж. АНУ-ын 6-р флотын мэдээлснээр, өнгөрсөн зургадугаар сард Оросын байлдааны онгоц газар дундын тэнгисийн дээгүүр, олон улсын агаарын орон зайд нисч байсан АНУ-ын онгоцыг гурван цагийн дотор гурван удаа саатуулжээ.

Эх сурвалж: CNN