• Цэнгэлдэх хүрээлэн: “Sent James Park” цэнгэлдэх 52 мянга 354 хүний суудалтай
• Дасгалжуулагч: Стив Брюс
• Багийн ахлагч: Жамал Ласселлс
• Лигийн аварга: дөрвөн удаа
• Цомын аварга: зургаан удаа
• Холбоодын цом: нэг  удаа
• Лига кап цом: 0
• Европын тавцанд үзүүлсэн амжилт: 0

“Шаазгайнууд” өнгөрсөн улирал багаа 2016-2017 оны улиралд дээд лигт эргэн гаргаж ирсэн дасгалжуулагч Р.Бенитезийг явуулсан нь багагүй асуудал дагууллаа. Учир нь Испани эрхмийг багийг орхиход клубын хөгжөөн дэмжигчид нэлээд их дургүйцлээ илэрхийлсэн. Багийн эзэн М.Эйшли Испани дасгалжуулагч Р.Бенитезийг явуулж түүний оронд С.Брюсыг авчирсан нь гал дээр тос нэмсэнтэй адил үйл явдал болсон бөгөөд одоо ч гэсэн багийн хөгжөөн дэмжигчид М.Эйшлигийн сонголтонд дургүйцлээ илэрхийлсээр байна. С.Брюс бол Английн дундаж түвшний дасгалжуулагч бол Р.Бенитез түүнээс хувь илүү гэдгийг хөлбөмбөг сонирхогчид андахгүй.

Ямартаа ч багийн удирдлагын шийдвэр багийн хөгжөөн дэмжигчдийн итгэлийг хөсөрдүүлж байгаа ч шинэ улиралд тэд бэлтгэж байна. Өнгөрсөн улирал Испани дасгалжуулагчтай Ньюкасл Юнайтед клуб лигтээ 12 хожил, 9 тэнцээ, 17 хожигдолтойгоор хүснэгтийн 13-р байранд бичигдсэн. Ирэх улиралд энэ амжилтаа ахиулна гэж харахгүй байгаа. Дээр нь солилцооны зэх зээл дээр удирдлагууд бас л хачирхалтай шийдвэр гаргаад байна. Сүүлийн 2 улирал клубын довтолгооны гол ачааг үүрсэн Испани довтлогч А.Перезийг Лейстер Сити клуб руу явуулаад Германы Хоффенхайм-1899 багаас Бразил довтлогч Жоэлингтоныг авчирсан. Германд тоглож байсан Бразил залуу премьер лигт хэр хурдан дасах бол? Гол довтлогч А.Перезээс гадна М.Диамег Араб руу, хаалгач Ф.Вүүдманыг Суонси Сити рүү тус тус явуулсан бол Жоэлингтон болон А.Сэйнт-Максимин нарыг нийт 60 сая паундаар энгээндээ нэгтгэжээ.

Дасгалжуулагч С.Брюс бол карьерынхаа турш дундаж багт, дундаж тоглогчидтой тоглосоор ирсэн. Ийм түүнээс том амбиц харахгүй л болов уу? Магадгүй ирэх улирал дээд лигтээ үлдэх эсэх нь ч эргэлзээтэй юм. Улирлын эхний тоглолтоо Арсенал клубын эсрэг хийнэ.

Б.БЯМБАБАЯР