БНСУ-ын Кванжу хотод 18 дахь удаагийн усан спортын дэлхийн аварга шалгаруулах тэмцээн болж байна. Тус тэмцээнд оролцож буй Манай улсын тамирчдаас өнөөдөр /2019.07.25/ ОУХМ Б.Энххүслэн 100м өврөөр даллах сэлэлтээр уралдаж, гараандаа гурваар орж, 59.76 амжилт үзүүллээ. Тэрбээр бямба гаригт долдугаар сарын 27-нд 50м өврөөр даллах сэлэлтээр уралдана.

Усан спортын ДАШТ-д оролцож буй манай улсын бусад тамирчдын хувьд  Х.Энхзул долдугаар сарын 26-ны өдөр 50м далайн гахай сэлэлтээр уралдах ажээ.

Харин  Спортын мастер М.Дэлгэрхүү баасан гаригт буюу долдугаар сарын 26-нд 50м өврөөр даллах сэлэлтээр уралдана. Тэрбээр 100м өврөөр даллах сэлэлтээр уралдаж, гараандаа хоёрдугаар байранд орж, 54.43 амжилтаар Монгол Улсын рекордыг шинэчилсэн билээ.

ОУХМ Г.Занданбалын хувьд долдугаар сарын 21-ний өдөр 100м мэлхий сэлэлтийн тэмцээнд уралдаж, 1:07.92 амжилтаар Монгол Улсын рекордыг шинэчилсэн бол өчигдөр /2019.07.23/50м мэлхий сэлэлтээр уралдаж, 30.23 амжилт үзүүлснээр тэмцээнээ өндөрлүүлсэн юм.

А.АНИР