Аймгуудын баяр наадам үргэлжилж байна. Хөвсгөл аймгийн наадам энэ сарын 26-ны Баасан гаригт болно. Энэ жил Мөрөн хот үүсэж хөгжсөний 210 жилийн ой, Хангайн бүсийн хурдан морины “Хотгойдын хурд-4” уралдааны нээлтийг хамтатган хийхээр товложээ. Сонирхолтой нь хөвсгөлчүүд энэ жил наадмын нээлтээ оройн 21.00 цагт нээхээр төлөвлөсөн байна.

Энэ үеэр хамгийн сүүлийн үеийн гэрэлтүүлэг бүхий орчныг бүрдүүлэх аж. Наадмын үеэр зургаан насны хурдан морь уралдаж, улс аймгийн алдар цолтой бөхчүүдийн барилдаан, Мөрөн сумын цолгүй бөхчүүдийн барилдаан, шагай, сурын харваа зэрэг тэмцээн наадам болох ажээ.

Мөрөн сумын ИТХ-аас гаргасан “Төлөвлөлт сайтай хотоос тохижилт сайтай хот болох” уриалгын дагуу албан байгууллага, аж ахуйн нэгж, иргэд дэмжин түүхт их ойгоо бүтээн байгуулалтын ажлаар угтаж буй юм байна.

Ойг угтан Мөрөн сумын байгууллага, өрх бүрт орчин тойрон хашаа хороогоо шинэчлэн тохижуулахыг уриалж, хашааны шохойг Засаг даргын тамгын газраас үнэ төлбөргүй олгож, соёлч өрх, аж ахуйн нэгж, албан байгууллагыг тодруулах аян зарласанд иргэд аж ахуйн нэгж байгууллага идэвхтэй оролцож байгаа аж.

Мөн ойн хүрээнд Улаанбаатар хот дахь Мөрөн сумын нутгийн зөвлөлийн санаачилгаар Хүндэтгэл ёслолын их өргөөтэй болжээ. Цаашид тус өргөөндөө Мөрөн сумын иргэдийн хуримын ёслол, хүндэтгэлийн арга хэмжээг зохион байгуулах аж. Тус аймгийн ойн баярын үеэр шилдэг 210 өрх, байгууллагыг тодруулах юм байна.

Б.ЖАРГАЛ