Улс төрийн тогтворгүй байдлыг төгсгөл болгох зорилгоор Венесуэлийн Засгийн газар, сөрөг хүчинтэй даваа гаригт хэлэлцээ хийхээр тохиролцсон байна.

Норвегийн зуучилсан хэлэлцээний дагуу өнгөрсөн тавдугаар сард Ослод болсон тэдний уулзалт амжилтад хүрээгүй бөгөөд энэ удаад Барбадост уулзахаар товложээ.

Венесуэлийн хууль ёсны удирдагч хэмээн 50 гаруй оронд хүлээн зөвшөөрөгдсөн, сөрөг хүчний удирдагч Хуан Гуайдо “Ямар ч яриа хэлэлцээ хямралыг зохицуулахад чиглэх ёстой бөгөөд Социалист намынханд цаг хожих боломж олгохгүй” гэж хэлжээ.

Хуан Гуайдо “Венесуэлийг Мадурогийн “дарангуйлал”-аас чөлөөлөхийн тулд шинээр чөлөөтэй, ил тод сонгууль явуулах шаардлагатай” хэмээн уриалсан байна. Тэрбээр өнгөрсөн долоо хоногийн Баасан гаригт CNN агентлагт ярилцлага өгөхдөө Венесуэлд "дарангуйлал" тогтсоныг онцлоод, түүнийг устгах, Венесуэлийн ард иргэдийн зовлон зүдгүүрийг төгсгөл болгохын тулд хэлэлцээ хийхээр болсон гэж хэлжээ.

Норвегийн Засгийн газрын мэдээлснээр, хоёр талын хэлэлцээ энэ долоо хоногт болох юм байна.

Эх сурвалж: CNN