ХХБанкны Эрдэнэт салбарын 20 жилийн ой амжилттай боллоо

Худалдаа, хөгжлийн банкны ууган салбаруудын нэг Эрдэнэт салбарын үүсгэн байгуулагдсаны түүхт 20 жилийн ой энэ онд тохиож байна.

ХХБанкны Эрдэнэт салбар анх 1999 онд Орхон аймгийн Баян-Өндөр сум буюу Эрдэнэт хотноо, одоогийн байр болох Чандмань төвд 807 дугаар салбар нэртэйгээр үйл ажиллагаагаа эхлүүлж байсан түүхтэй.

Эрдэнэт салбар байгуулагдсанаар анх удаа орон нутагт VISA картаар Эрдэнэт Үйлдвэрийн 4000 гаруй ажилтны цалинг картаар олгож, АТМ буюу бэлэн мөнгө олгох автомат машины үйлчилгээг онлайн сүлжээтэйгээр нэвтрүүлж байлаа.

Харилцагчдынхаа тав тух, сэтгэл ханамжийг нэмэгдүүлэх зорилгоор Эрдэнэт салбар түүхт 20 жилийн ойгоо угтан Их Британийн “Allen international consulting group”-ийн олон улсын стандартын дагуу салбартаа засвар, тохижилт хийн шинэ өнгө төрх орууллаа.

Мөн 20 жилийн ойн баяраараа хүүхэд, залуучуудын мэдлэг боловсролд хувь нэмрээ оруулах зорилгоор Эрдэнэт хотынхоо дөрөвдүгээр сургуулийн номын санг тохижуулж, багш нарын талархал, бяцхан хүүхдүүдийн баяр хөөр дунд хүлээлгэн өгсөн юм.