Америкийн “Apple” компани ухаалаг цагийнхаа шинэ загвар болох “Apple Watch 2”-ыг бүтээж байгаа тухай тус улсын хэвлэлүүдэд мэдээлж байна.

"Apple” компанийнхан "ухаалаг" цагийнхаа шинэ хувилбарт дүрс бичлэгийн камер суурилуулахаар төлөвлөж байна гэж олон эх сурвалж мэдээлж байна. Үүнээс гадна, “iPhone” ухаалаг утастай холбогдох шинэ бөгөөд сайжруулсан системтэй болно” гэж телевизийн CNBC суваг мэдээлсэн байна.

“Apple Watch 2” цаг нь мөн хэд хэдэн шинэ үйлдэлтэй болох бөгөөд энэ нь бие даан ажиллах чадлыг нь нэмэгдүүлэх аж. Үүний сацуу "Apple" компани тансаг зэрэглэлийн цагийнхаа төрлүүдийн тоог нэмэгдүүлэхээр төлөвлөжээ. Энэ нь өнгөрсөн дөрөвдүгээр сард зах зээлд гаргасан алт болон цагаан алтан корпустай "ухаалаг" цагийнх нь эрэлт нэмэгдсэнтэй холбоотой байна.

“Apple Watch”-ийн хоёр дахь загвар 2016 онд дэлгүүрүүдийн лангуунд тавигдах төлөвтэй байна.
Ухаалаг цагийнх нь эхний хувилбарыг худалдан авсан хүмүүсийг ч “Apple”–ийнхан мартаагүй аж. Сайжруулсан үйлдлийн систем болох “watchOS 2.0”-ийг тэд ирэх намраас татах боломжтой болно.