Орхон голоос ус авах гэж байгаад усанд живсэн харамсалтай хэрэг гарчээ. Тодруулбал, Сэлэнгэ аймгийн Хушаат сумын Даагатай багийн Товуухан гэдэг газар Сонгинохайрхан дүүргийн харьяат 30 настай эмэгтэй А нь саваар ус авах гэж байгаад Орхон голын усанд живсэн тухай дуудлага энэ сарын 26-ны өдөр тус аймгийн Онцгой байдлын газарт иржээ.

Энэ дагуу аймгийн онцгойгийн таван аврагч, ар гэрийн 16 хүн, нийт 21 хүн, гурван техник хэрэгсэлтэй ажиллаж энэ сарын 27-ны байдлаар Товуухан гэдэг газраас Хушаатын гүүр хүртэл голын усаар хоёр  удаа 25 км-т, нэг удаа шумбалт хийж, голын баруун эргээр явганаар 28 км -т эрэн хайх ажиллагааг зохион байгуулсан боловч үр дүнд хүрээгүй тул 20:30 цагт түр зогсоожээ.

Ингээд өнөө өглөөний 06:00 цагаас эрэн хайх ажиллагааг эхлүүлж осолдсон газраас зүүн тийш 9 км-ээс 07:24 цагт цогцсыг олж уснаас гарган аймгийн Цагдаагийн газрын жижүүрийн бүрэлдэхүүнд шилжүүлэн өгсөн юм байна.

Э.АРИУН