УИХ-ын гишүүн Д.Оюунхорол өчигдөр Тусгаар тогтнолын ордонд тойргийнхоо иргэд, сонгогчдод Үндсэн хуульд оруулах нэмэлт, өөрчлөлтийн төслийг танилцуулж, санал бодлыг нь сонсох уулзалтыг зохион байгууллаа. Уулзалтын эхэнд УИХ-ын гишүүн Д.Оюунхорол Үндсэн хуульд оруулах нэмэлт, өөрчлөлтийн төслийг боловсруулах болсон нийгмийн хэрэгцээ, шаардлагын талаар тайлбар хийж, УИХ-ын хариуцлага, үйл ажиллагааг сайжруулах, Гүйцэтгэх эрх мэдлийн тогтвортой, хариуцлагатай байдлыг хангах, Шүүх эрх мэдлийн хариуцлага, хараат бус байдлыг хангах,  Нутгийн удирдлагын тогтолцоог боловсронгуй болгохтой холбоотой дөрвөн багц асуудлын 20 заалтыг дэлгэрэнгүй танилцуулав.

Тухайлбал, УИХ-ын хариуцлага, үйл ажиллагааг сайжруулахтай холбоотой хэсгийн танилцуулгадаа “УИХ өөрөө хариуцлагатай байж, нийгэмд үлгэрлэх ёстой гэдэг шүүмж, шаардлагыг иргэд тавьдаг. Эл асуудлыг энэ удаагийн парламент чухалаар авч үзэж, УИХ-ын чуулганы хуралдааны дэгийн тухай хууль зэрэг холбогдох хууль журамд өөрчлөлт оруулснаас гадна энэ удаагийн Үндсэн хуульд оруулах нэмэлт, өөрчлөлтийн төсөлд ч хариуцлага сайжруулахыг УИХ-аасаа эхлэхээр тусгасан. Хуулийг 20 гишүүн бус 39-ээс дээш гишүүн баталдаг байхаар заалт төсөлд тусгалаа. Мөн ээлжит чуулганы хугацаанд 50 хоног хуралддаг байсан бол одоо 75-аас дээш хоног болгох гэж байна” хэмээн онцолж хэлэв.

Танилцуулгын дараа иргэд “Аливаа хууль бус асуудлыг илрүүлж гаргах хянан шалгах ажил манай улсад бүрэн устсан гэж үздэг, тийм учраас энэ асуудлыг Үндсэн хуульд заавал тусгая. Хувийн компанитай, ашиг сонирхлын зөрчил гаргах хүмүүсийг УИХ-д нэр дэвшүүлмээргүй байна. Үндсэн хуулийг анх батлахдаа хариуцлагын тогтолцоог бага оруулсан. Үүнээс үүдэлтэйгээр өнөөдрийн замбараагүй байдал үүссэн. Өнөөдөр хэлэлцэн батлах гэж байгаа өөрчлөлтөөр хариуцлагын тогтолцоог хэр их сайжруулахаар тусгана, төдий хэрээр үр дүн нь харагдана. “Давхар дээл”-ийг бүрмөсөн хориглож, нэг ч хүн давхар алба хашдаггүйгээр зааж өгье. Ерөнхийлөгчийг зургаан жилийн хугацаагаар зөвхөн нэг удаа сонгоно гэдэг заалтыг хэлэлцүүлгийн явцад хасах гээд байх шиг байна, ингэж болохгүй. Энэ заалтыг яг энэ хэвээр нь батлах хэрэгтэй.  Ерөнхийлөгчийг намаас дэвшүүлдгийг болиулмаар байна. УИХ-ын хууль хэлэлцэх ирцийг өндөрсгөж, 60-70 хувьтай болгомоор байна. Гишүүдийг үр дүнгүй гадаад томилолтод болон орон нутагт ямар нэг бүтээн байгуулалтын нээлтэд явуулах зэрэг шаардлагагүй ажилд явуулж, төсвийг үрмээргүй байна. Улаанбаатар хотын эрх  зүйн байдлын тухай хууль гаргаж, дүүргүүдийг  орон нутгийн чанартай хот болгож, хороодыг дүүрэг болгомоор байна” хэмээн санал хэлж байлаа. Мөн  Үндсэн хуульд нэмэлт өөрчлөлт оруулахыг дэмжиж байгаа гагцхүү хэд хэдэн заалтыг чангаруулах хэрэгтэй гэв. Тухайлбал УИХ-ын гишүүдийг эгүүлэн татдаг хариуцлагын тогтолцоог Үндсэн хуульдаа тусгах хэрэгтэй. Засгийн газрын сайд нар УИХ-ын гишүүн давхар суудалгүй буюу дан дээлтэй байх ёстой гэв. Мөн дүүргийн Засаг дарга нарыг иргэд сонгож, хариуцлага алдвал эгүүлэн татдаг болгох хэрэгтэй гэж үзэж буйгаа онцолсон юм.