Ес хоногийн өмнө Украины Ерөнхийлөгч Владимир Зеленскийг Берлинд угтан авах ёслолын арга хэмжээний үеэр бие нь тавгүйрхэж, дагжтал чичирч байсан Меркель дахин бэрхшээлтэй тулгарчээ. ХБНГУ-ын Ерөнхийлөгч Франк-Вальтер Штайнмайерын хүлээн авалтын арга хэмжээнд оролцож байхдаа тэрбээр дахин дагжтал чичирсэн байна.
Чичирч салганаж буй гараа тогтоож ядан байгаа түүнд аягатай ус авчирч өгсөн ч уухаас татгалзжээ. Энэ явдал Меркелийг “Их 20”-ын бүлгийн удирдагчдын дээд хэмжээний уулзалтад оролцохоор Японы Осака хотыг зорихоос өмнө тохиосон аж.
Штайнмайерыг ярьж байх үед канцлерын хөл чичирч, гар нь салганаж байсан бөгөөд энэ байдал хоёр минут орчим хугацаанд үргэлжилжээ.
Германы сайд нарын танхимаас дээрх арга хэмжээний дараа “Меркелийн биеийн байдал сайн, удахгүй “Их 20”-ийн уулзалтад оролцохоор Япон руу нисэх гэж байна” хэмээн мэдэгджээ.
Эх сурвалж: Bild
