Харвардын их сургуулийн Азийн манлайллын төвийн санаачилгатай “Asia Leadership Conference 2015” чуулга уулзалтыг Улаанбаатар хотод 6-р сарын 27-нд зохион байгуулах гэж байна. Азийн томоохон улс орнуудад жил бүр зохиогддог энэхүү чуулга уулзалтыг Глобал менежерүүдийн нийгэмлэг хамтран Монголд анх удаа зохион байгуулна гэдгээрээ онцлогтой. Чуулганы хүрээнд Харвардын Их Сургуулийн дэргэдэх Харвард Бизнесийн сургууль, Жон Кеннедийн нэрэмжит Харвардын төрийн удирдлагын сургууль, Харвардын боловсролын сургуулийг 2015 онд төгсөж байгаа 16 орны улс төр, эрүүл мэнд, боловсрол болон хөрөнгө оруулалтын салбарт ажилласан туршлагатай 30 гаруй манлайлагч залуу Улаанбаатар хотод хүрэлцэн ирнэ. Энэ үеэр өөрсдийн мэдлэг, туршлага ур чадвараа Монголын ирээдүй болсон бизнесийн салбарынхан, оюутан залуус, сурагчид гээд боловсролдоо хөрөнгө оруулалт хийхээр зорьж байгаа хэн бүхэнтэй хуваалцах юм. Тухайлбал Харвардын их сургуулийн хичээлийн хөтөлбөрт багтсан тэргүүлэх хичээлүүдийг богино хугацааны программ болгож, гурван төрлийн үйл ажиллагаа буюу ерөнхий мэргэшил дээшлүүлэх семинар, багаар ажиллах дасгал бүхий сургалт, карьерийн зөвлөгөө өгөх семинаруудаар дамжуулан зохион байгуулна. Мөн оролцогчидтой Харвардын их сургуулийн төгсөгчид санал бодлоо солилцож, цаашид хамтын ажиллагаагаа өргөжүүлэх боломжийг олгох юм.

“Asia Leadership Conference”-ийн тухайд нийгэм, эдийн засаг, улс төрийн болон олон нийтийн салбарыг хамарсан олон улсын арга хэмжээ юм. Харвардын их сургуулийн Азийн манлайллын төв нь 2012 оноос эхлэн бүс нутгийн залуу мэргэжилтнүүдэд төрийн удирдлага, боловсрол , нийгмийн чиглэлээр  өөрсдийн туршлага болон мэдлэгээ хуваалцах зорилгоор Ази тивийн улс орнуудаар чуулга уулзалт зохион байгуулж байна. Энэ онд Азийн зургаан орон буюу Филиппин, БНХАУ-ын Гуанжоу болон Шинжинь, Хонг-Конг, Тайландад зөвхөн Харвардад заадаг хичээл, семинаруудыг явуулсан. Харин энэ сарын 27-нд оюундаа хөрөнгө оруулалт хийхээр зорьж байгаа Монголын оролцогчидтой Харвардын төгсөгчид бүтэн өдрийг өнгөрүүлж, мэдлэг чадвараа хуваалцах юм байна.

Дэлгэрэнгүй мэдээллийг: www.asia.beglobal.mn