АНУ, Иран чөлөөт бөхийн дэлхийн аваргад барилдах бөхчүүдээ тодрууллаа

Есдүгээр сард Америкт болох чөлөөт бөхийн дэлхийн аварга шалгаруулах тэмцээнд оролцох тамирчдаа дэлхийн бөхийн толгой орнууд болох Иран, АНУ өнгөрсөн долоо хоногт тодруулжээ.

АНУ-ын хувьд Дэлхий аварга, Олимпийн наадамд өрсөлдөх бөхчүүдээ тун өрсөлдөөнтэй, өндөр зохион байгуулттайгаар тодруулдаг уламжлалтай. Эхлээд улсын аварга шалгаруулах тэмцээнээ явуулна. Дараагаар нь жин тус бүрийн чансааг гаргаад, өндөр чансаатай бөхчүүдийнхээ дунд дахин сорил тэмцээн зохиодог. Энэ сорил тэмцээнд бөхчүүд өрсөлдөгчөө хоёр удаа ялж байж ялсанд тооцогддог. Энэ удаад Дэлхийн аваргын сорил тэмцээнд 57 кг-д Тони Рамос, 61-д Риц Хэмфри, 65-д Брэнт Меткалф, 70-д Жеймс Грин, 74-д Жордан Барроуз, 86-д Жейк Херберт, 97-д Кайл Снайдер, 125-д Тервелл Длагнев нар түрүүлж, Лас-Вегаст болох дэлхийн аваргад оролцох эрхээ авчээ.

Длагнев финалд Зак Рейтэй гурван барилдаан хийхдээ 2:1, 3:4, 3:0-ээр буюу нийлбэр дүнгээр 2:1-ээр хожсон байна. Өсвөрийн дэлхийн аваргад түрүүлж байсан Кайл Снайдер олимпийн аварга Жейк Варнерийг 4:1, 3:0-оор илүүрхжээ. Орчин цагийн бөхийн гол нүүр царай болчихоод буй Жордан Барроуз Кайл Дакийг 6:3, 14:4-өөр илт давамгайлжээ.

Ингээд өнгөрсөн дэлхийн аваргад өрсөлдсөн АНУ-ын шигшээ багаас Рамос, Мелткаф, Барроуз, Длагнев нар энэ дэлхийн аваргад дахин ирэхээр болж, бусад нь шинэчлэгджээ.

Жим Хэмфри ба түүний хүү Риц Хэмфри

1977 оны Дэлхийн аваргын медаль Жим Хэмфригийн хүү Риц Хэмфри аавынхаа шийрийг хатаахаар дэлхийн аваргад барилдах болсон нь содон. Хербертийн хувьд хоёр дэлхийн аваргыг өнжсөнийхөө дараагаар дахин оролцохоор боллоо. Харин Жеймс Грин, Кайл Снайдер нарын хувьд анхных нь дэлхийн аварга болох юм.

Ираны аварга шалгаруулах тэмцээн мөн болж өнгөрлөө. Бөхийн орны бүх л шилдэг бөхчүүд хоорондоо өрсөлдсөн бөгөөд Хассан Рахими, Бехнам Эхсанпур, Ахмад Мохаммади, Хасан Яздани, Алиреа Гасеми, Реза Яздани, Парвиз Хади нар улсынхаа аварга болж, дэлхийн аваргад барилдах эрхээ авчээ. АНУ-ыг бодвол Ираны сонгон шалгаруулах тэмцээн хоёр ялалтаар бус хоёр ялагдлаар хэмжигдсэн байна. Хоёр ялагдсан бөх тэмцээнээс хасагдах байдлаар зохион байгуулсан аж.

Өнгөрсөн дэлхийн аваргад оролцсон тамирчдаас Рахими, Мохаммади, Яздани нар л Лас-Вегасыг зорихоор болжээ.

Р.Гэгээ

Эх сурвалж: http://horom.mn