ОХУ-ын Ерөнхийлөгч Владимир Путин зургадугаар сарын 20-ны пүрэв гаригт 17 дахь удаагаа иргэдийнхээ асуултад шууд хариуллаа. Жил бүр уламжлал болон зохион байгуулагддаг “Владимир Путинтэй шууд холбогдох шугам” шууд нэвтрүүлэг пүрэв гаригт Москвагийн цагаар 12.00 цагт эхэлж, хойд хөршийн Төрийн тэргүүн дөрвөн цаг 10 минутын турш нийт 80 гаруй асуултад хариулж, иргэдтэйгээ шууд холбогдон ярилцав. Энэхүү нэвтрүүлгийг "Первый", "Россия-1", "Россия 24", НТВ, ОРТ, "Маяк" радио станц, "Вести FM", Радио России" шууд дамжуулсан байна.

Энэ удаагийн шууд ярилцлага нь Ерөнхийлөгч Путины нэр хүнд огцом унаж буйн эсрэг зохион байгуулагджээ. Өнгөрсөн жил Путины оролцсон шууд нэвтрүүлэг сүүлийн зургаан жилийн хугацаан дахь телевизийн хамгийн бага хандалттай нэвтрүүлгээр нэрлэгдсэн байна. Энэ жилийн хувьд Путинд 1. 5 сая гаруй хүн хандаж, 400 мянга гаруй мессэж илгээжээ.

Тэрбээр барууны хоригтой холбоотой асуултад хариулахдаа “Хоригоос үүдэн ОХУ 2014 оноос хойш 50 тэрбум ам.доллар, Евросоюз 240 тэрбум ам.доллар, АНУ 17 тэрбум ам.доллар, Япон 27 тэрбум ам.доллар алдсан” гэж тодотгожээ. Путин “Баруунтай эвлэрнэ гэж юу гэсэн үг вэ? Бид хэнтэй ч муудаалцаагүй. Муудалцах хүсэл алга. Эвлэрэх тухай яриа гараагүй. Гаднаас ямар нэг дохио ирж болох л юм, гэхдээ эрс өөрчлөлт гарахгүй” гэсэн байна.

Путин АНУ-ын Ерөнхийлөгч Дональд Трамптай олон улсын аюулгүй байдал болон хоёр талын харилцааны асуудлаар хэлэлцээ хийх боломжтой гэж үзэж буй аж. Тэрбээр Оросын эсрэг тавьсан АНУ-ын хоригийг алдаа гэж хэлээд, америкчууд үүнийгээ засч залруулах болно гэжээ. Путин Трамптай хийсэн уулзалтынхаа талаар хэлэхдээ “Яриа хэлэлцээ хийх шаардлагатай. Мэдээж Америкийн тал хэлэлцээр хийх сонирхлоо илэрхийлвэл бид ч мөн түншийхээ адил ийм хэлэлцээрт бэлэн. Тэнд юу болж байгааг бид харж байна. Ерөнхийлөгч нь ямар нэг алхам хийхийг хүссэн ч эрх баригчид нь үйл ажиллагаатай холбоотой маш олон хязгаарлалт тавьдаг.  Тэр тусмаа, өнөөгийн төрийн тэргүүн дахин сонгогдохоор сонгуулийн кампанит ажлаа эхлүүлсэн тул энэ ажлынхаа шаардлагад нийцэж харагдах ёстой. Тиймээс бидний харилцаа бүх талаар амар болохгүй гэж бодож байна” гэжээ.

Путин Украины шинэ Ерөнхийлөгч Владимир Зеленскийг маш авьяастай хүн хэмээн хэлээд, “2000-аад онд болов уу, Москвад КВН-д тоглож байсныг нь санах юм. Маш чадварлаг тоглож байсан, үнэхээр инээдтэй байсан. Одоо бол инээдтэй биш. Энэ бол хошин шог биш, эмгэнэл. Тэр одоо өндөр албан тушаалд очсон учраас асуудлуудыг шийдэх хэрэгтэй. Тэр сонгуулийн кампанит ажлынхаа үеэр энэ талаар ярьж, мөрийн хөтөлбөрийнхөө цөм болгож байсан. Мөн хэт даврагчидтай хэлэлцээр хийхгүй гэж мэдэгдэж байсан. Энэ асуудлыг хэрхэн шийдэх вэ? Сөргөлдөгч талууд хэлэлцээр хийхгүйгээр шийдэгдсэн нэг ч сөргөлдөөн орчин үеийн түүхэнд байхгүй.

Украины зэвсэгт хүчин гал нээх нь ихэссэн. Зеленский сонгуулийн өмнөх кампанит ажлынхаа үеэр буудалцаан зогсоно, бүслэлт ч байхгүй болно гэж хэлж байсан. Гэтэл юу ч хийсэнгүй. Бүслэлт улам л хүчирхэгжиж байна. Түрүүлж алхам хийх нь маш энгийн зүйл шүү дээ. Украины удирдлага улс төрийн хүсэл зориг гаргах хэрэгтэй байгаа юм” хэмээн хэлжээ.

Путин “Нью-Йорк таймс” сонинд АНУ Оросын эрчим хүчний сүлжээ рүү цахим халдлага хийсэн гэх нийтлэл гарсан тухай сонссоноо хэлээд, “Энэ нийтлэлийг гаргасан хүмүүсийг Трамп урвагчид гэж нэрлэснийг олж харсан. Гэхдээ Трампын энэ үгийг хэрхэн ойлговол зохих вэ? “Нью-Йорк таймс” бодит мэдээлэл цацав уу? Ямартай ч бид үүнд хариу өгөх ёстой.

Бид Амеркийн түншүүддээ цахим орон зай дахь дүрэм боловсруулах талаар олон удаа санал тавьсан ч хариулт аваагүй. Эрчим хүчний салбар зэрэг нэн чухал дэд бүтцийн салбараа бид анхаарч, аливаа цахим халдлага, сөрөг нөлөөнөөс хэрхэн хамгаалж, аюулгүй байлгах талаар бодох ёстой. Бид зөвхөн бодоод зогсохгүй хийж байна” хэмээн хариулжээ.

Путин “Миний санаж байгаагаар, сэтгэлзүйчид “Залхуурал бол бие организм нь амрахыг хүсч байгаагаас үүдэлтэй, хүний хэвийн байдал гэж хэлдэг. Амрах ёстой. Гэхдээ залхууралтай ажил хийж л тэмцэхгүй бол өөр арга байхгүй” хэмээн хэлсэн байна.

Харин тэрбээр Оросын зэвсэглэлийн талаар “Орос улс бол батлан хамгалахын зардлаа танаж байгаа агуу цэргийн гүрэн. Бид батлан хамгаалах салбартаа ихгүй зардал гаргаж байгаа ч цөмийн тэгш байдлыг хангаж байгаа төдийгүй хоёр гурван алхмаар өмнө нь явна. Дэлхийн аль ч оронд ийм орчин үеийн зэвсэг байхгүй. Энэ бол бидэнд улс орноороо бахархах сэдэл төрүүлэх юм” гэж ярьжээ.

Оросын нэгэн иргэн Путинээс ямар нэг байдлаас болж ичиж, санаа зовж явдаг асуудал бий юу хэмээн асуусан байна. Хойд хөршийн төрийн тэргүүн 2000 оны эхэн үед болсон явдлын улмаас өнөөдрийг хүртэл ичиж явдгаа өгүүлжээ. Тэрбээр "Одоо энэ талаар ярихад хэцүү байгаа ч гэсэн хүлээн зөвшөөрөхгүй байх аргагүй" гэжээ. Түүний хэлснээр, намар цагт бүс нутгуудад ажиллаад, буцах замд нь нэгэн хижээл насны эмэгтэй таарч, юу ч хэлэлгүй өмнө нь өвдөг сөгдөн суусан байна. ОХУ-ын удирдагчийн хэлснээр, эмэгтэй түүнд нэгэн бичвэр атгуулсан бөгөөд Путин заавал анхаарч уншихаа амлажээ. Харамсалтай нь, Путин тэрхүү бичвэрийг туслахууддаа өгсөн ч тэд түүнийг гээжээ.

"Би үүнийг хэзээ ч мартахгүй. Надад одоо ч ичгэвтэртэй байдаг. "Би түүнд юун тухай бичсэн байсныг бараг л гадарлаж байна. Тийм олон бичвэр уншиж байсан. Магадгүй тус бичвэр шоронд орсон хүүдээ туслахыг хүссэн, энэ чиглэлийн хүсэлт байсан болов уу. Гэхдээ асуудлын гол нь үүнд биш, хамгийн гол нь тэр эмэгтэйн бичвэрийг гээсэнд л байгаа юм" хэмээн хэлжээ.

Шууд ярилцлагын үеэр Путин хэдэнтээ хошигнож, хэд хэдэн онигоо ярьсан байна. Ярилцлагын төгсгөлд Путинээс түүнийг “Харь гаригийн хүн биш биз?” гэж асуужээ. Путин инээн, хөтлөгч “Яг үнэнээр нь хэлнэ шүү” гэж наргижээ. Путин хариулахдаа “Үгүй дээ. Миний төрөл төрөгсөд, ойр дотныхон гэсэн гэрчүүд, мөн нотлох баримтууд ч бий. Миний хүүхдүүд ч мөн гэрчилнэ” гэсэн байна.

Дашрамд дурдахад, Кремлийн төлөөлөгч энэ удаа оросуудын хувьд Путинтэй шууд холбогдож, сонирхсон асуултдаа хариулт авах сонирхол их байсан талаар мэдээлсэн билээ. 2001 оны арванхоёрдугаар сард болсон анхны шууд нэвтрүүлэгт 400 мянган асуулт ирж байсан бол 2002-2005 онд 1.1-1.5 сая, 2006 онд 2 сая 334 мянган асуулт ирүүлжээ. Дараагийн дээд амжилтыг 2007 онд тогтоосон бөгөөд Путинд 2.5 сая хүн хандсан байна.

2013 оны нэвтрүүлэгт 3 сая асуулт, 2015 онд 3.25 сая асуулт тус тус ирүүлжээ. Сүүлийн гурван жил асуултын тоо 2.5-2.8 саяын хооронд хэлбэлзэж байсан бол энэ удаагийн нэвтрүүлэгт зургадугаар сарын 19-ний байдлаар 1 сая 315 мянга 763 асуулт ирсэн талаар "Россия-24" суваг мэдээлсэн билээ.

Эх сурвалж: TASS, BBC