Оросын Хабаровск мужид харъяалагддаг далайн эргийн хоёр том боомтыг нэгтгэж нэг төв болгох тухай Хабаровск мужийн Тээвэр, замын аж ахуйн эрхэлсэн сайд Валерий Немытов Пүрэв гаригт /2019.06.20/ сэтгүүлчдэд мэдээллээ.

Хабаровск мужийн экспортыг нэмэгдүүлэх асуудлаар зохион байгуулсан мужийн Амбан захирагч уулзалтын үеэр энэ асуудал яригдсан байна. Бүс нутгийн тээврийн коридорыг хөгжүүлэх ирээдүйн төлөвийн хүрээнд дээрх санал тавигджээ.

Тухайлбал, Ванино болон Совгавань боомтыг нэгтгэн нэг комплекс болгох талаар яригдаж байгаа бөгөөд шийдвэрийг ирэх 2020 онд гаргах юм.

Ванино боомт Оросын экспортын гол боомтын нэг бөгөөд энэ боомтоор дамжуулан Оросын зүүн болон зүүн хойд мужууд Япон, БНСУ, БНХАУ, Австрали, АНУ болон Ази, номхон далайн орнууд руу экспортын бараа бүтээгдэхүүнээ гаргадаг. Совгавань боомт нь Ванинотой зэргэлдээ байдаг, нэг ерөнхий дэд бүтэцтэй боомтууд юм.

Эх сурвалж: РИА НОВОСТИ