Элэгний С вирусээр өвчилсөн, яаралтай эмчилгээ хийлгэх шаардлагатай иргэдийн бүртгэлийг цахимаар авч байна. Монгол Улсад 2013 оны байдлаар элэгний С вирустэй 200 мянга гаруй иргэн бий. Эдгээрийн 50 мянга гаруй нь нэн шаардлагатай эмчилгээ хийлгэж, эм хэрэглэх хэмжээний хүнд өвчтэй юм. Тиймээс Канад улсад үйлдвэрлэн оруулж ирж буй элэгний С вирусын эсрэг Харвони эмийг нэн даруй хэрэглэх шаардлагатай иргэдийн нэгдсэн бүртгэлийг цахимжуулж байгаа аж.

Элэгний архаг С вирустэй иргэдийн хувьд одооноос өрхийн эмнэлэгтээ хандаж шинжилгээ өгөх замаар бүртгүүлнэ. Ингээд өрхийн эмнэлгийн мэдээллийг цахим системд оруулах замаар Харвони эмийг нэн тэргүүнд хэрэглэх шаардлагатай иргэдийн жагсаалтыг гаргах юм.

Элэгний С вирусын эсрэг Харвони эм нь уг өвчнийг бүрэн устгана хэмээн албаныхан тайлбарлаж байгаа. АНУ-ын “Gilead Sciences” компани Харвони эмийг Канадын үйлдвэрт үйлдвэрлүүлж буй. Монгол Улсад “Хүртээмж” хөтөлбөрийн хүрээнд Харвони эмийг оруулж, эмийн жагсаалтад бүртгүүлсэн билээ.

Б.ЗАЯА