“Эрдэнэт” үйлдвэрийг барьцаалж Өмнөд Африкийн “Стандарт” банкнаас 100 гаруй сая ам.долларын зээл авсан хэргээр хуулийнханд шалгагдаж байгаа “Жаст” –ын Ш.Батхүүгийн үл хөдлөх хөрөнгийг Авлигатай тэмцэх газар/АТГ/-ынхан битүүмжилснээр Засгийн газар хохирлоо нөхөн төлүүлэх боломж бүрдэж буй ажээ.

Энэ тухай Засгийн газрын хэрэг эрхлэх газрын дэд дарга Л.Оюун-Эрдэнэ өнөөдөр /2019.06.19/ мэдэгдлээ. АТГ нийтдээ  52 тэрбум төгрөгийн үл хөдлөх хөрөнгө битүүмжилсэн юм байна. Цаашид ч хөрөнгө нэмэгдэж 87 орчим тэрбумд хүрэх боломжтой гэнэ.

Хэдийгээр Ш.Батхүүгийн учруулсан хохирлыг барагдуулахад дээрх битүүмжилсэн хөрөнгө хаанаа ч хүрэхгүй ч ор алдахаар тал алд гэж хагас хугасыг нь ч болов олж авах нь ээ.

Нэгэн цагт банк санхүүгийн салбарт цахиур хагалж, олон арван хүнийг ажлын байраар ханган гялалзаж явсан тэрбээр "Хадгаламж" банк нь дампуурахтай зэрэгцэн бусад бизнес нь ч асуудалтай тулсан. Улмаар хуурамч баримт бүрдүүлэн "Эрдэнэт" үйлдвэрийг барьцаалан зээл авсан хэрэг нь илэрч, хуулийнханд саатуулагдахад хөрөнгө мөнгө нь шамшигдсан уу, юу ч үгүй болсон тухай дуулиан дэгдэж байсан удаатай. Гэхдээ хуулийнхан ажилласнаар зах зухыг нь илрүүлж чаджээ.

Г.ХОРОЛ