Унгарын нийслэл Будафешт хотын Дунай мөрөнд жуулчдын усан онгоц осолдсоны улмаас БНСУ-ын долоон иргэн амиа алдаж, 19 хүн сураггүй болсон тухай өмнө нь мэдээлсэн билээ. Уг хэрэгтэй холбогдуулан тус усан онгоцны ахмадыг баривчилсан байна.

Онгоцны ахмад нь Украины 64 настай иргэн бөгөөд түүнийг анхаарал болгоомж алдсаны улмаас осол аваар гаргасан хэмээн сэжиглэж байгаа ажээ. Дунай мөрөнд осол аваар маш ховор гарч байсан бөгөөд дээрх ослыг мөрдөн шалгах ажиллагаа үргэлжилж байгаа аж.

БНСУ-ын “Korea Times” агентлагийн мэдээнд дурдсанаар, жуулчдын дийлэнх нь 40-50 насны хүмүүс байсан бөгөөд зургаан настай нэг хүүхэд байжээ. БНСУ-ын Ерөнхийлөгч Мүн Жэ Ин уг асуудлаар Унгарын талтай хамтран боломжтой бүх арга хэмжээг авахыг холбогдох албаныханд үүрэг болгоод байгаа ба Унгар луу төлөөлөгчдөө яаралтай илгээхээр болжээ.

Эх сурвалж:KOREATIMES