Д.Оюунхорол: Боловсрол нь ядуурлыг бууруулах гол хүчин зүйлүүдийн нэг мөн | News.MN

Д.Оюунхорол: Боловсрол нь ядуурлыг бууруулах гол хүчин зүйлүүдийн нэг мөн

Д.Оюунхорол: Боловсрол нь ядуурлыг бууруулах гол хүчин зүйлүүдийн нэг мөн

Д.Оюунхорол: Боловсрол нь ядуурлыг бууруулах гол хүчин зүйлүүдийн нэг мөн

Тогтвортой хөгжлийн зорилгын хэрэгжилтийн асуудлаарх Олон Улсын Парламентын Холбооны Ази, Номхон далайн бүсийн хоёрдугаар чуулганы нээлтийн хуралдаанд Монгол Улсын Их Хурлын гишүүн, Нийгмийн бодлого, боловсрол, соёл, шинжлэх ухааны байнгын хорооны дарга Д.Оюунхоролын хэлcэн үгийг бүрэн эхээр нь хүргэж байна. 

Эрхэм анд найз нараа,

Хүндэт парламентчид аа,

Хатагтай, ноёд оо

Тогтвортой Хөгжлийн Зорилгын хэрэгжилтийг хангах асуудлаар манай эх оронд болж буй Олон Улсын Парламентын Холбооны Ази, Номхон далайн бүсийн хоёрдугаар чуулганд оролцож буй Та бүхэнд Монгол Улсын Парламентын нэрийн өмнөөс болон хувиасаа чин сэтгэлийн талархал илэрхийлье.

Дэлхий нийтээрээ хамтран баталсан “Тогтвортой хөгжил-2030” хөтөлбөрийн хэрэгжилтийг хангахад улс орнуудын Парламентын оролцоо их гэдгийг бид бүгд хүлээн зөвшөөрч байгаа. Парламент нь Тогтвортой Хөгжлийн Зорилгыг хэрэгжүүлэхэд чиглэсэн эрх зүйн таатай орчныг бий болгох, шаардлагатай нөөц хөрөнгийг улсын төсөвтөө суулгах, улмаар үр өгөөжтэй хэрэгжүүлэх талаар Засгийн газрын хариуцлагыг дээшлүүлж, хяналт тавихад онцгой үүрэгтэй.

Монгол Улсын Их Хурал дэлхийн хамтын нийгэмлэгийн өмнө хүлээсэн энэхүү үүргээ биелүүлэн, “Тогтвортой хөгжлийн үзэл баримтлал-2030” хөтөлбөрийг 2016 онд баталснаар хүн төрөлхтний хөгжлийн нийтлэг үзэл санаа, чиг хандлагыг үндэсний бодлогодоо тусган баталгаажуулсан анхдагч улсуудын нэг болсон.

Байгаль орчин, уур амьсгалын өөрчлөлт зэрэг олон асуудал дан ганц улсын дотоод хэрэг байхаа нэгэнт больж, бүс нутгийн болоод дэлхий нийтийн хамтын ажиллагааг шаарддаг болсоор багагүй хугацаа өнгөрчээ. Бүсийн улс орнууд газар зүйн байршил ойроос гадна шашин, соёл, зан заншил, тулгамдсан асуудлууд ч мөн нийтлэг юм. Энэ нь аливаа асуудлыг шийдвэрлэхэд хамтын шийдэл, гарц олоход ихээхэн дөхөмтэй. Ази, Номхон далайн бүс нутаг нь хүн амын тоо, дэлхийн эдийн засагт эзэлдэг хувь, оролцоогоороо ч томоохон жин дарж буй. Энэ агуулгаараа тулгардаг бэрхшээл, сорилтууд нь ч мөн багагүй юм.

Ийм цаг үе дор Олон Улсын Парламентын Холбоо нь Ассамблейн нэгдсэн хуралдаанаараа ТХЗ-уудыг удаа дараа нухацтайгаар хэлэлцэж ирсэн. Мөн хэрэгжилтэд гарч буй ахиц дэвшил, сайн туршлагыг хуваалцах, тулгарч буй бэрхшээл сорилтоо шийдвэрлэх арга замаа хамтран тодорхойлох боломж олгох зорилгоор бүс нутгийн парламентын чуулганыг санаачлан, хамтран зохион байгуулан, тусалж дэмжиж байгаад бид ихээхэн талархаж байгаа.

Вьетнам Улсын Хо Ши Ми хотод болсон ТХЗ-ын асуудлаарх Ази, Номхон далайн бүсийн анхдугаар чуулганаар хэлэлцсэн асуудлын хүрээнд Монгол Улсын хэрэгжүүлж буй  арга хэмжээ, гарч буй ахиц дэвшлийн талаар товч танилцуулъя.

Өнгөрсөн чуулганаар ТХЗ-ын хэрэгжилтийг хангахад парламентын гүйцэтгэх үүрэг оролцоо, уур амьсгалын өөрчлөлт, байгаль орчны асуудлуудыг түлхүү хөндөн ярилцсан. ТХЗ-ын хэрэгжилтэд гүйцэтгэх үүрэг, оролцоогоо нэмэгдүүлэх чиглэлээр Монгол Улсын парламент 2018 онд Нийгмийн бодлого, боловсрол, соёл, шинжлэх ухааны байнгын хорооны дэргэд Тогтвортой хөгжлийн дэд хороог байгуулсан. Ижил чиг үүрэг бүхий хороо дэлхийн улс орнуудын парламентын зөвхөн 30 орчим хувьд байгаа нь Монгол Улсын Их Хурал уг асуудалд ихээхэн ач холбогдол өгч буйн нотолгоо юм.  Уг дэд хороо нь байгууллага хоорондын уялдааг сайжруулах, НҮБ болон бусад байгууллагуудтай хамтран ажиллах, хурал чуулганд илтгэл тавьж, хэлэлцүүлэх, Үндэсний сайн дурын тайлан бэлтгэх зэрэг чиглэлээр үйл ажиллагаагаа явуулж байна. Мөн Хо Ши Миний чуулганаар ашиглахыг уриалсан ТХЗ-ын хэрэгжилтийн асуудлаар парламент өөрийгөө хэрхэн үнэлэх тухай ОУПХ-ны удирдамжийг орчуулан, үйл ажиллагаандаа хэрэглэж эхлээд байна.

 Хэлэлцсэн гол сэдэв болох уур амьсгалын өөрчлөлт болон байгаль орчны асуудлын тухайд Монгол Улсын парламент энэ чиглэлээрх олон улсын гэрээ, конвенцүүдэд нэгдэн орсноос гадна “Ногоон хөгжлийн бодлого”, “Уур амьсгалын өөрчлөлтийн тухай үндэсний хөтөлбөр” зэрэг үндэсний бодлогын баримт бичиг батлан, ногоон хөгжил, ногоон эдийн засагт шилжихийг зорьж байна. Монгол Улс Дэлхийн ногоон эдийн засгийн индексийн “Манлайлал”-ын үзүүлэлтээр “сайн” үнэлгээ авсан.

 Монгол Улс уур амьсгалын өөрчлөлтөд дасан зохицоход анхаарахаас гадна үйлдвэрлэлийн салбарт байгальд ээлтэй дэвшилтэт техник, технологи нэвтрүүлэх, үр ашиг, бүтээмжийг нэмэгдүүлэх, бохирдуулагч нь төлбөр төлөх зэрэг эдийн засгийн хөшүүрэг хэрэглэх замаар хүлэмжийн хийн ялгарлыг бууруулах, нэгэнт ялгарсан хүлэмжийн хийг шингээх ой мод, ургамлын нөмрөгийг нэмэгдүүлэх зэрэг хүлэмжийн хийн бус аргаар уур амьсгалын өөрчлөлтийг сааруулахад хувь нэмэр оруулах чиглэл баримталж ажиллаж байна.

Эрх зүйн орчныг сайжруулах чиглэлээр сүүлийн хоёр жилд Монголын парламент Хог хаягдлын тухай, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай, Ус бохирдуулсны тухай хуулиудад тус тус нэмэлт, өөрчлөлт оруулснаар орчны бохирдол, хүлэмжийн хийн ялгарлыг бууруулахад чиглэсэн ногоон татвар, ногоон худалдан авалтын тогтолцоог бүрдүүлэх эрхзүйн томоохон шинэчлэл хийсэн.

Монгол Улсын хэмжээнд тогтвортой хөгжлийн зорилгын шалгуур үзүүлэлтүүдэд 2015-2018 онд нийт 4 удаа үнэлгээ хийсэн. Түүнээс гадна Засгийн газар 2019 онд Тогтвортой хөгжлийн зорилтын үндэсний шалгуур үзүүлэлт, зорилтот түвшнийг тодорхойлох үүрэг бүхий 8 дэд ажлын хэсгийг шинэчлэн байгуулсан.  Энэ хүрээнд Тогтвортой Хөгжлийн Зорилтын шалгуур үзүүлэлтүүдийг үндэснийхээ онцлогт тохируулан нэмж боловсруулж байна. Чингэхдээ, үнэлэх боломжгүй тохиолдолд аргачлалыг нь бий болгох, мэдээллийн эх үүсвэр нь тодорхойгүй бол тодруулах зэргээр ажиллаж байна.

Энэ удаагийн чуулганаар  ядуурлыг бууруулахад боловсролын гүйцэтгэх үүрэг; байгаль орчин, байгалийн нөөцийг хамгаалах, зүй зохистой хэрэглэх; уур амьсгалын өөрчлөлтийн нөлөөллийг бууруулах; хүн бүрийн эрүүл энх, сайн сайхан аж төрх байдлыг хангах; Тогтвортой Хөгжлийн Зорилгын хэрэгжилтэд хяналт тавих, үнэлэхэд шаардлагатай мэдээллийн эх үүсвэрийг олж авах; иргэний нийгмийн оролцоог дээшлүүлэх зэрэг асуудлаар хууль тогтоогчдын зайлшгүй анхаарах ёстой олон чухал асуудлын гарц, шийдлийг тодорхойлох, бусад улс орнуудын туршлага, ажлын арга барилаас суралцах, санал солилцох өргөн боломж олгож байгаад түүний ач холбогдол оршиж байна.

Боловсрол нь ядуурлыг бууруулах гол хүчин зүйлүүдийн нэг мөн хэмээн тодорхойлон, хэлэлцэх гэж байгаа нь манай орны хувьд цаг үеэ олсон, чухал асуудал болж байна. Учир нь эмэгтэйчүүд, хүүхдүүд гэр бүлийн орчинд аливаа хэлбэрийн дарамт, хүчирхийлэлд өртөх нь ихсэж, тэдний аюулгүй, эсэн мэнд амьдрах, хөгжих суурь эрх нь зөрчигдөх явдал газар авсаар байна. Энэ нь иргэдийн боловсролын түвшин доогуур, нийгэм дэх ажилгүйдэл их байгаагаас үүдсэн архидалт, ядууралтай шууд холбоотой. Боловсрол, ядуурал, эрүүл мэнд, ажил эрхлэлт зэрэг нийгмийн асуудлууд харилцан хамааралтай байгаа нь парламентчид биднээс хууль тогтоомж, бодлогын уялдаа холбоогоо улам сайжруулахыг зүй ёсоор шаардаж байна.

Тогтвортой хөгжил нь ирээдүй хойч үеийнхэндээ хор хөнөөл учруулахгүйгээр өнөөгийн хэрэгцээгээ хангаж, дэлхий нийтээрэй ядуурлыг бууруулж орлогын тэгш бус хувиарлалтыг арилгаж, эх дэлхийгээ хамгаалж, хүн бүр амар тайван хөгжил цэцэглэлтийг бий болгож, өөрсдийн амьдралын хэв маягаа, хөрөнгө оруулалт, бизнес, үйлдвэрлэл болон хэрэглээний арга барилыг өөрчлөхийг уриалж байна. Өнөөдөр ярилцаж буй, хийж буй үйл ажиллагаанууд нь ирээдүй хойч үеийнхэнд өөрчлөлт авчрах боломжтой бөгөөд хэнийг ч орхигдуулахгүйгээр, хүн бүр хөгжлийн үр шимийг хүртэж, их дэлхийгээ хайрлан хамгаалахыг зорьж байна.

Дэлхий дээр урьд өмнө байгаагүй мэдээллийн хувьсгал болж байгааг мэдээлэл хуваалцах боломжийг зөв ашиглаж, мэдээллийн их үүсвэрийг нэгтгэх хамтын ажлллагааг шинэ шатанд гаргахад бид онцгой анхаарч, хамтарч ажиллахыг уриалж байна.

Тогтвортой хөгжлийн зорилгыг хэрэгжүүлэхэд улс орнуудын түншлэл тэр тусмаа бүс нутгийн хамтын ажиллагаа нэн чухал болохыг дахин онцлохыг хүсэж байна.

Энэ удаагийн уулзалт анхдугаар чуулганаар гарсан санал, зөвлөмжийг улам бататган баяжуулах, ТХЗ-ыг хангахад шаардлагатай шинэ шийдэл, арга замыг тодорхойлох, бүс нутгийн парламентын хамтын ажиллагааг улам бэхжүүлэхэд ач холбогдол бүхий арга хэмжээ болно гэдэгт итгэж байна.

Чуулганы үйл ажиллагаанд амжилт хүсье.

Анхаарал тавьсанд баярлалаа.

"Болор дуран"-аар шалгав.
Энэ мэдээнд өгөх таны сэтгэгдэл?
1
ХахаХаха
0
ЗөвЗөв
0
ХөөрхөнХөөрхөн
0
ГайхмаарГайхмаар
0
ХарамсалтайХарамсалтай
0
ТэнэглэлТэнэглэл
0
БурууБуруу
Баярлалаа!

Холбоотой мэдээ

5 сэтгэгдэл

News.mn сайтад сэтгэгдэл оруулахад анхаарах зүйлс

Avatar

Хууль биелүүлдэггүй хүмүүсээ зайлуулаа 2019-05-27 103.14.38.137

Монголын Шинжлэх ухааны байгууллагаа үнэндээ бөөн хахууль, албан тушаалын наймаа болж, ажил огт хийлгэхгүй болсон. Албан тушаалд нам дамжсан луйварчингууд гараад л бүхнийг завхруулж байна. Аудит нь ирж шалгаад хахууль аваад юу ч илрүүлэхгүй байна. Санхүүгийн бөөн луйвар.

Avatar

Dorz 2019-05-27 83.23.240.89

Buldog tsaraatai omhii avgai hahuul alaad l

Avatar

Зочин 2019-05-27 139.5.216.60

БОЛОВСРОЛЫН ДЭЭД НЬ УНАГАН БАГЫН ӨВ ТЭГШ ХҮМҮҮЖИЛ ЮМ ШҮҮ ДЭЭ. ТЭРНЭЭС ЧИНИЙ БАЙГУУЛСАН ДЭЭД НЭРТЭЙ ТМС БИШ ЮМ. ӨВ ТЭГШ ХҮМҮҮЖИЛГҮЙ ХҮН ХИЧНЭЭН ДЭЭД СУРГУУЛЬ ТӨГСӨӨД ХИЧНЭЭН ГАДААД ХЭЛ СУРААД УЛАМ Л ДАЙСАН БОЛДОГ ГЭДГИЙГ ТҮҮХ ГЭРЧИЛНЭ

Avatar

Оюунхорол 2019-05-27 150.69.34.101

Монголчууд Унтахаа багасгаж ажиллахаа ихэсгэвэл ядуурал бага ч гэсэн буурах байх даа

Avatar

Зочин 2019-05-27 202.131.227.178

чи мөнх нойрондоо нойрс

NewsMN Гар утасны хувилбар Татах
NEWS.mn

Мэдээллийн эх сурвалж