Д.Батбаатар

МАН-ын Хяналтын хорооны дарга

-МАН-ын Хяналтын хороо тавдугаар сарын 16-ны өдөр хуралдаж, УИХ-ын гишүүн Д.Дамба-Очир Эдийн засгийн байнгын хорооны даргаар ажиллаж байхдаа Оюутолгойд шалгалт хийсэн ажлын хэсгийн дүгнэлтийг Байнгын хорооны хуралдаанаараа хэлэлцүүлэхээс өмнө Оюутолгой компанид хүргүүлснээ хүлээн зөвшөөрсөн бөгөөд уг асуудалтай нь холбогдуулан түүнд таван жилийн хугацаанд улс төрийн дэмжлэг үзүүлэхгүй байх шийдвэрийг гаргасан байсан. Харин УИХ-ын гишүүн Ш.Раднаасэдийн хувьд Эрүүгийн хуулийн хөөн хэлэлцэх хугацааг тооцохдоо гэмт хэрэг үйлдсэн өдрөөс эхлэн анхан шатны шүүхийн шийдвэр хүчин төгөлдөр болсон өдрөөр дуусгавар болгох заалтыг оруулсан. Тиймээс Ш.Раднаасэд гишүүнийг Хууль зүйн байнгын хорооны даргын албан тушаалаас нь чөлөөлөх, намаас таван жилийн хугацаанд улс төрийн дэмжлэг үзүүлэхгүй байх нь зүйтэй гэж үзэн мөн намаас таван жилийн хугацаанд дэмжлэг үзүүлэхгүй гэдэг шийдвэрийг гаргасан.Ингэхдээ таван жилийн хугацаанд улс төрийн дэмжлэг үзүүлэхгүй гэсэн нь сонгуульд нэр дэвшүүлэхгүй гэсэн ойлголт юм. Тус шийдвэрийг хэрэгжүүлж ажиллахыг МАН-ын бүлгийн дарга Д.Тогтохсүрэнд үүрэг болгосон.

У.Хүрэлсүх:

МАН-ын дарга:

-Харин энэ асуудлаар УИХ дахь МАН-ын бүлэг тавдугаар сарын 17-нд хуралдаж, Хяналтын хорооны шийдвэрийг эсэргүүцэж, гишүүд ч шүүмжлэлтэй хандсан юм. Харин МАН-ын Хяналтын хорооны дарга Д.Батбаатар гаргасан шийдвэртээ “үнэнч” байна хэмээн гүрийсэн учраас ийнхүү бүлгийн хурлын дараа МАН-ын Удирдах зөвлөл Төрийн ордонд хуралдсан. Удирдах зөвлөлийн хуралдаан оролцсон гишүүдийн олонх хяналтын хорооны шийдвэрийг  хүлээж авах боломжгүй, Хяналтын хороо шийдвэрээ эргэн харах шаардлагатай хэмээн үзсэн юм. Ийнхүү Удирдах зөвлөлийн хуралдааны үеэр УИХ-ын гишүүн Ш.Раднаасэд намын даргадаа намаасаа гарах өргөдлөө өгсөн юм. Гэвч намын дарга У.Хүрэлсүх “Энэ өргөдлийг чинь би хүлээж авахгүй, гэхдээ хадгалж байя. Ш.Раднаасэдээ намаас гарна гэсэн зүйл байхгүй, байж бай” гэсэн хариу өгчээ.

Ш.ЧИМЭГ