МУБТА, СТА Ц.Батхуягийн нэрэмжит Нийслэлийн Баянгол дүүргийн 73-р дунд сургуулийн үе үеийн төгсөгчдийн сагсан бөмбөгийн аварга шалгаруулах тэмцээн боллоо. Тэмцээний нээлтийн үйл ажиллагаанд тус сургуулийн үе үеийн удирдлагууд, эрдэмтэн багш нар хүрэлцэн ирсэн байна. Нээлтэнд зориулж СТА Д.Эрдэнэтуяагаар удирдуулсан БГД-ийн "Эрдмийн Ундраа" цогцолборын 100 сурагч Ц. Батхуягийн үг, ая "Миний найз", "Миний багш" дуугаар мэндчилгээ дэвшүүлжээ. Мөн Ц.Батхуяг багшийн ууган шавь нарын зарим нь энэ үеэр сагсан бөмбөгийн спортын цол, зэрэг авчээ. Ц.Батхуяг нь боловсролын салбарт урлаг, спортоор дагнан 20 гаруй жил ажилласан. Энэ салбаруудад Монгол улсын нүүр царайг илэрхийлэх олон шавь нартайн дотроос ОУХМ, Монголын сагсан бөмбөгийн шигшээ багийн холбон тоглогч О.Сэргэлэн багшийнхаа нэрэмжит энэхүү тэмцээнийг хүндэтгэн оролцож байгаагаа илэрхийлсэн. Ц.Батхуяг нь соёл урлагийн салбарт 100 орчим дуу бүтээсний тал хувь нь спортын дуунууд байдгаараа онцлогтой. МУБТА, СТА Ц.Батхуяг багш “Эрдмийн Ундраа" цогцолбортой хамтран 100 хүүхдийн 10 найрал дуун дээр ажиллаж байгаагаа энэ үеэр хэлсэн юм.

Б.ОНОН