Хятадын тэргүүн баячуудын нэг “Alibaba” цахим худалдааны сайтыг үүсгэн байгуулагч Жек Ма ирэх есдүгээр сарын 10-нд буюу компанийнхаа 20 жилийн ойгоор тэтгэвэртээ гарах гэж байгаагаа зарлажээ. Тэрбээр пүрэв гариг /2019.05.16/-т Парист болсон “Viva Tech” бага хурлын үеэр энэ тухай ярьсан байна.

Өдгөө 54 настай тэрбумтан Жек Ма нь анх коллежийн англи хэлний багшаас ажлын гараагаа эхэлж байсан гэдэг. Тиймдээ ч тэрбээр тэтгэвэртээ гарсныхаа дараа дахин англи хэлээ заах хүсэлтэй байгаа аж.

Жек Ма "Англи хэл заах нь миний хийх дуртай ажил" гээд, “Alibaba”-гаас олсон орлогоо ямар нэгэн банкинд хадгалах, эсвэл янз бүрийн төсөлд хөрөнгө оруулах биш, Хятадын боловсролын системийг сайжруулахад зориулахаа мэдэгджээ. Тэрбээр өөрийгөө огт хөгширсөн гэж бодохгүй байгаа ба дахиад 15 жилийг боловсролын салбарт ажиллаж өнгөрөөнө хэмээн хэлсэн байна.

Эх сурвалж: Business Insider