УИХ-ын гишүүн асан Г.Батхүү Төрийн ордонд таалал төгсчээ

УИХ-ын гишүүн асан, Ардчилсан намын гишүүн Шунхлай группийн ерөнхийлөгч Г.Батхүү өнөөдөр /2019.05.17/ орой 19.10 цагийн үед Төрийн ордонд таалал төгсчээ. Тодруулбал, Төрийн ордны баруун жигүүрийн нэг давхарын шатны ойролцоо хүн унасан, нас барсан байдалтай байсныг харсан хүмүүс Төрийн ордны хамгаалалт болон түргэн тусламж дуудсан байна. Гэвч түргэн тусламж ирэхэд нас барсан байжээ. Хэргийн газарт Сүхбаатар дүүргийн цагдаагийн хэлтэс мөрдөн шалгалт хийсэн байна. Албан бус мэдээллээр Г.Батхүү асан шатнаас унасан байж болзошгүй гэнэ.

Тэрээр өнөөдөр авто машины сонирхогчдын уралдааны хуралд оролцохоор Төрийн ордонд ирсэн байжээ. Мөн өнөөдөр Засгийн газраас зохион байгуулсан ТОП-100 аж ахуй нэгж шалгаруулах ёслолд ч оролцсон юм байна. Хуулийн байгууллага одоо энэ хэргийг шалгаж байгаа учраас мэдээлэл өгөхгүй гэлээ.

Зарим эх сурвалжуудын мэдээлж буйгаар түүнийг өнөөдөр Төрийн ордонд зүгээр явж байсан гэдгийг хэлж байгаа юм.

ГАВААГИЙН БАТХҮҮ НЬ

1978 онд Өвөрхангай аймгийн Арвайхээр хотын 10 жилийн дунд сургууль
1983 онд ЗХУ-ын Харьков хотын Инженер-эдийн засгийн дээд сургууль Инженер- эдийн засагч мэргэжлээр
1999 онд ШУТИС-ийн Бизнесийн удирдлагын ухааны магистаар тус тус төгссөн
1983 онд Авто засварын заводын Их засварын цехэд засварчин, мастер
1983 – 1987 онд Авто засварын үйлдвэрийн нэгдэлд хэлтсийн дарга
1987 – 1991 онд Тээврийн яаманд БХЗГ-т ахлах мэргэжилтэн
1991 – 1996 онд “Шунхлай” ХХКомпаний ерөнхий захирал
1996 – 1999 онд Дэд бүтцийн хөгжлийн яаманд Зам тээврийн газрын дарга
1999 – 2000 онд Монгол Улсын Засгийн газрын гишүүн, Дэд бүтцийн хөгжлийн сайд
2000 – 2002 онд “Инфра структур” ХХКомпаний захирал
2002 – 2004 онд “АПУ” ХКомпаний гүйцэтгэх захирал
2004 – 2008 онд Монгол Улсын Их Хурлын гишүүн
2004 – 2006 онд Монгол Улсын Засгийн газрын гишүүн, Зам тээвэр, аялал жуулчлалын сайд
2008 – 2012 онд Монгол Улсын Их Хурлын гишүүн
2008 – 2012 онд Монгол Улсын Их Хурлын дэд дарга
2012 оноос Монгол Улсын Их Хурлын гишүүнээр тус тус ажиллаж байсан юм.