Электрон дугуйг оросууд ихээр хэрэглэдэг болж байгаа тухай РИА Новости агентлагийн явуулсан санал асуулгад худалдаа эрхлэгчид хариулсан байна. "М.Видео" болон "Эльдорадо" дэлгүүрүүдэд өмнөх оны мөн үетэй харьцуулахад 2019 оны дөрөвдүгээр сард электрон дугуйны борлуулалт 15 дахин нэмэгдэж, борлуулалтын орлого найм дахин өсчээ.

Электрон дугуй нь жирийн дугуй, гироскутер, ролик зэргийг бодоход хэрэглэхэд хамаагүй хялбар хэмээн "Связной-Евросеть" сүлжээ дэлгүүрийн хэвлэлийн алба хэлж байна. Тэдний дэлгүүрийн хувьд дөрөвдүгээр сард электрон дугуйны борлуулалт найм дахин өссөн байна. Үнийн хувьд харьцангуй хямд, боломжтой байгаа нь борлуулалтад мөн нөлөөлж байгааг дэлгүүрүүдийн борлуулагчид хэлж байна. Борлуулалт нэмэгдэж байгаа учраас өнгөрсөн жилтэй харьцуулахад үнэ 35 хувиар хямдарч хамгийн хямд нь 15 мянган рубль болоод байгаа юм. Чанараасаа хамааран электродугуйны үнэ 15-60 мянган рублийн хооронд байна. Харин хүүхдийн дугуйны хувьд 7-19 мянгын хооронд борлуулж байна.

Дунд зэргийн үнэтэй электрон дугуй нь цагт 25 км зам туулах чадвартай, 100 хүртэл кг жингийн даацтай байгаа ажээ. Харин дугуй нь томрох тусам үнэ өсдөг байна. Ийм дугуйнууд нь амортизатортай, нэмэлт батарейтай учраас илүү хол замыг туулах боломжтой ажээ.

ЭХ СУРВАЛЖ:РИА НОВОСТИ