Нэгэн үе нэлээд түгээмэл хэрэглэж байсан эм бол диакарб. Хүүхэд болгон шахам тархины даралттай төрж, тэр хэрээрээ энэ эмний хэрэглээ эрс нэмэгдсэн. Диакарбыг манай улс Польш улсын Польфарма эмийн үйлдвэрт үйлдвэрлэсэн хувилбараар нь эмийн бүртгэлд бүртгүүлсэн байдаг ажээ. Тодруулбал, Польшийн Польфарма үйлдвэрийн Диакарб (ацетазоламид) 250мг шахмал эм нь эмийн бүртгэлд бүртгэгдсэн хүчин төгөлдөр эм гэсэн үг. Энэхүү эмийг уушги-зүрхний дутмагшлаас шалтгаалсан хаван, нүдний глауком /нүдний дотоод даралт ихсэх/ өвчин, шээс хөөх зорилгоор болон эпилепси /уналт, таталт/ -ийн үед эмийн сангууд жороор олгох ёстой.Гэтэл энэ эмийг ОХУ-ын “Акрихин” эмийн үйлдвэрт савласан гэсэн хаягтай, бүртгэлийн загвараас зөрүүтэйгээр зах зээлд худалдаалах болжээ. Улсын бүртгэлийн загвараас зөрүүтэй Диакарб эмийн савлагаанд ОХУ-ын “Акрихин” үйлдвэрт үйлдвэрлэсэн гэсэн бичигтэй, хэрэглэх  арга, зааврын бичилт, үйлдвэрлэсэн огноо, цуврал, бүртгэлийн дугаар, эмийн найрлагын бичилт байгааг МХЕГ-аас анхааруулж байна.

Цаашид эмийн бүртгэлийн загвараас зөрүүтэй эмийг импортлох, худалдах, хэрэглэхгүй байхыг Мэргэжлийн хяналтын байгууллага сэрэмжлүүлж байна. Манай улсад  үйлдвэрлэх, импортлох, худалдах эм, эмийн түүхий эд, биологийн идэвхт бүтээгдэхүүнийг улсын бүртгэлд бүртгүүлсэн байх ёстой. Ингэхдээ эмийн чанар аюулгүй байдлын баталгааг хангах чиглэлээр эрүүл мэндийн тусламж үйлчилгээний хэрэгцээнд нийцүүлэн эмчилгээний өндөр идэвхтэй, чанартай, аюулгүй эмийг  бүртгэдэг гэдгийг тодотгож, диакарб эмийг худалдан авахдаа үйлдвэрлэсэн улсыг нь хянаж байхыг санууллаа.

Д.ЦЭЭНЭ