-Нацү башёгийн сүүлийн өдөр түрүү бөх тодорно-

Японы мэргэжлийн сүмо бөхийн Нацү башё сонирхолтой үргэлжилж байна. Токио хотноо явагдаж буй тавдугаар сарын тэмцээний түрүү бөх маргааш тодрох юм. Одоогоор башёг их аварга Хакүхо М.Даваажаргал, сэкивакэ Тэрүнофүжи Г.Ган-Эрдэнэ нар адил 11 даваа, 3 унаатай болж, тэргүүлэгчдийн эгнээнд бичигдэж байна.

Өнөөдөр буюу башёгийн 13 дахь өдөр их аварга Хакүхо озэки Кисэносатод ялагдлаа. Харин энэ өдөр сэкивакэ Тэрүнофүжи Г.Ган-Эрдэнэ сэкивакэ Миёогирюүг давснаар түрүү бөхийн эгнээнд Хакүхотой хамт зэрэгцэж ирлээ. Түүний хувьд маргааш маэгаширагийн 6-с барилдаж буй 9 даваатай яваа Аойяматай оноолт таарсан байна. Харин Хакүхо-Харүмафүжитай барилдана.

Ёкозүна Харүмафүжи озэки Котошёогикүгээр 10 дахь даваагаа авсан бол ахмад бөх Кёкүтэнхо Н.Цэвэгням Саданофүжигээр тавин хувийн амжилтаа үзүүллээ.

Сүүлийн өдрүүдэд Хакүхотой хамт башёг тэргүүлж байсан Бразилын бөх Кайсэй өнөөдөр Точиношинд ялагдаж, 10 даваатай боллоо.

Башёгийн эхний өдөр комүсүби Ичиножёо А.Ичинноровт ялагдсан их аварга Хакүхо япон озэки цолтнуудад дараалан уналаа. Тэрээр 12 дахь өдөр озэки Гоэйдо, 14 дэх өдөр озэки Кисэносатог барсангүй.

Ийнхүү Нацү башёгийн 14 өдрийн дараагаар ёкозүна Хакүхо, сэкивакэ Тэрүнофүжи Г.Ган-Эрдэнэ нар 11 даваа, 3 унаатайгаар тэргүүлж байгаа бол ёкозүна Харүмафүжи, озэки Кисэносато, маэгашира Такаясү, Кайсэй, Икиой, Ёшиказэ нарын зургаан бөх 10 даваа, 4 унаатай удаалж байна.

Макүүчи:

Ёкозүна Хакүхо 11-3

Ёкозүна Харүмафүжи 10-4

Озэки Кисэносато 10-4

Озэки Котошёогикү 6-8

Сэкивакэ Тэрүнофүжи Г.Ган-Эрдэнэ 11-3

Комүсүби Ичиножёо А.Ичинноров 7-7

Маэгашира 5 Тамаваши Б.Мөнх-Оргил 5-9

Маэгашира 11 Кёкүшюхо Т.Эрдэнэбаатар 8-6

Маэгашира 12 Араваши Э.Дөлгөөн 2-12

Маэгашира 14 Кёкүтэнхо Н.Цэвэгням 8-6

Башёгийн сүүлийн өдөр буюу маргааш:

Ёкозүна Хакүхо  – ёкозүна Харүмафүжи

Озэки Кисэносато – озэки Котошёогикү

Сэкивакэ Тэрүнофүжи – М-6 Аойяма

М-8 Такэказэ – сэкивакэ Миёогирюүтэй оноолт таарчээ.

Өмнөх өдрүүдийн бичлэгээс хүргэж байна.

Ч.БОЛОР