Аугаа эх орны дайны ялалтын байгуулсны 74 жилийн ойн баярын өдрөөр Монгол Улсаас Оросын Холбооны Улсад суугаа Элчин сайдын яамны Хэргийг түр хамаарагч О.Очирмаа тэргүүтэй ЭСЯ-ны ажилтнууд, Москва хотод суралцаж буй оюутан залуусын төлөөлөл Москва хотын Хүндэтгэлийн дэнж дэх Ялалтын цэцэрлэгт хүрээлэнд “Ялалтад тэмүүлсэн морьд” хөшөөнд цэцэг өргөж, хүндэтгэл үзүүлэв.

“Ялалтад тэмүүлсэн морьд” хөшөөг Аугаа Эх орны дайны Ялалтын 70 жилийн ойг тохиолдуулан Монголын ард түмнээс Оросын ард түмэнд бэлэглэсэн бөгөөд хөшөөг Москва хотын Хүндэтгэлийн дэнж дэх Ялалтын цэцэрлэгт хүрээлэнд 2017 оны 5 дугаар сард ёслол төгөлдөр байрлуулсан билээ.

1941 оны 6 дугаар сарын 22-ны өдөр дайн эхлэхэд Монгол Улсын төр, засгийн газар мэдэгдэл гаргаж ЗХУ-тай байгуулсан гэрээндээ тууштай үнэнч байхыг нотолж дайныг ялалтаар дуусгахад бүх талаар тусалж дэмжихээ илэрхийлсэн байдаг. Хөдөлмөрч ард түмнийхээ халуун сэтгэлийн хандиваар бэлгийн цуваануудыг бүрдүүлэн, шилдэг сайн агт морьдоо өгч, “Хувьсгалт Монгол” танкийн цуваа, “Монгол Ард” нисэх онгоцны эскадрилийг байгуулан Улаан армид бэлэглэсэн нь Берлинийг хүртэл тулалдаж ялалт байгуулахад бодит үүрэг гүйцэтгэсэн билээ.

Эх сурвалж: ГАДААД ХАРИЛЦААНЫ ЯАМ