Монголбанкнаас оюутны эрдэм шинжилгээний бага хурлыг зарлажээ. Эрдэм шинжилгээний хурал тавдугаар сарын 25-ны өдөр тус банкинд болох гэнэ.  Монголбанкнаас зарласан эрдэм шинжилгээний бага хуралд оролцсон болон эл хурлыг сонирхож очсон бүх хүмүүст Монголбанкны Эрдэнэсийн санг үзүүлэх ажээ.

Монгол Улсад банкны тогтолцоо үүссэний  80 жилийн ойг тохиолдуулан /2004 онд/ “Эрдэнэсийн сангийн үзмэр”-ийг анх байгуулж байжээ.  “Эрдэнэсийн сангийн үзмэр”-т Чингис хааны үеийн түүхэн зоосууд, дурсгалын алт, мөнгөн зоосууд, Шашин төрийг хослон баригч Богд хааны алт, мөнгө, хаш тамганууд, манж, төвд, хятадаас Богд хаанд ирүүлсэн алтан өргөмжлөлүүд зэрэг түүхийн хосгүй үнэт зүйлс болон түүхэн хүмүүсийн эдэлж хэрэглэж байсан үнэт эдлэл, монгол дархчуулын урласан ховор нандин эдлэл хэрэглэлүүдийг хадгалж байдаг ажээ.
“Эрдэнэсийн сан”-г үзэх боломж хэн бүхэнд нээлттэй бөгөөд иргэд, аж ахуйн нэгж байгууллагууд хүсэлтээ Монголбанкинд бичгээр ирүүлж,  ажлын өдрүүдэд үзэх боломжтой байдаг гэнэ.

Д.ЦЭЭНЭ