Хөлбөмбөгийн Европа цомын хагас шигшээгийн хариу тоглолт болж өндөрлөлөө. Шигшээ тоглолтод Английн "Челси" болон "Арсенал" клубууд шалгарсан.

"Челси" клуб хагас шигшээд Германы "Айнтрахт" клубтэй тоглож, үндсэн цагт 1-1 харьцаатай тэнцээд, нэмэлт цагт гоолгүй өндөрлөсөн. 11 метрийн цохилтоор ялагчийг тодруулахад "Челси" клубын хаалгач Кепа өрсөлдөгч багийн хоёр тоглогчийн цохилтыг зогсоож, 4-3 харьцаатай ялалт байгуулсан юм. Хоёр баг үндсэн нийлбэр дүнгээр 2-2 тэнцэж, 11 метрийн цохилтоор шийдвэрлэх хариуцлагатай үед хаалгач Кепа багаа авч гарав.

"Арсенал" клуб Испаний "Валенси" клубтэй тоглож, 4-2 харьцаатай ялалт байгуулж, нийлбэр дүнгээр 7-3-аар өрсөлдөгчөө хожиж, шигшээ шатанд шалгарсан байна. "Валенси" клубын талбайд болсон тоглолтод П.Обамеянг хет-трик хийжээ.

Аваргуудын лигийн шигшээд Английн хоёр баг шалгараад байгаа бол Европа цомын шигшээд мөн Английн хоёр баг шалгарлаа.

Б.БЯМБАБАЯР