Ази тивийн эмэгтэйчүүдийн волейболын аварга шалгаруулах тэмцээнд оролцож буй манай улсын шигшээ баг өнөөдөр Японы багтай тоглосон ч 0:3-аар хожигдож, шөвгийн наймд шалгарч чадсангүй.

БНХАУ-ын Тяньжин хотноо болж буй Олимпийн эрх олгох уг тэмцээнд 14 улсын баг оролцож байгаагаас өнөөдөр хэсгийн тоглолт өндөрлөж, шөвгийн наймын багууд тодорч эхэллээ.

Манай шигшээ баг “С” хэсэгт Япон, Вьетнамын багуудтай таарсан юм. Энэ хэсгийн Турксменистаны баг тодорхой шалтгааны улмаас оролцох боломжгүй болсон. Вьетнамын баг хэсэгтээ хоёр хожилтойгоор тэргүүлсэн бол Японы баг удаалав. Хэсэгтээ хоёр хожигдолтой манай шигшээ баг Энэтхэгийн багтай ирэх ням гаригт тоглох юм. Энэтхэгийн багийн хувьд “А” хэсэгт БНХАУ, Ираны багт хожигджээ. Гэхдээ тэд Ираны тоглолтоос нэг сэтийг өөрийн болгосон байна.

"C" хэсэг:

V.20 Вьетнам-Япон 3:2 (16-25, 22-25, 25-22, 25-22, 18-16)

V.21 Вьетнам-Монгол 3:0 (25-18, 25-14, 25-13)

V.22 Монгол-Япон 0:3 (20-25, 15-25, 11-25)

V.24 Монгол-Энэтхэг

Багийн ахлах дасгалжуулагчаар Готовын Баярсайхан, туслах дасгалжуулагчаар Батдоржийн Хэрлэн, багийн менежерээр Тэрбишийн Алтансүх нар ажиллаж байна.

Багийн бүрэлдэхүүнд Г.Цэцэгжаргал (багийн ахлагч), А.Батжаргал, С.Пүрэвжаргал, Ч.Номинчулуун, Г.Энхнаран, Б.Энхзаяа, Г.Хонгорзул, Г.Хандсүрэн, Б.Цолмон, М.Сувдмаа, Ч.Халиун, С.Отгонбямба нар багтжээ.

Ч.БОЛОР