Токио хотноо үргэлжлэн явагдаж буй Нацү башёгийн 12 дахь өдөр башёг тэргүүлж байсан Бразилын бөх Кайсэй уналаа. Тэрээр өнөөдөр маэгашира-6-с барилдаж буй Аойяматай оноолт таарсан ч дийлдлээ. Ингэснээр Кайсэй 10 даваа, хоёр унаатай болж, Хакүхо ялалт байгуулбал тэргүүлэгчдийн эгнээний хоёрт бичигдэж эхлэх юм.

Сүмогийн түүхэнд Бразилын анхны түрүү бөх төрөн гарах уу болов уу гэж үзэгчид хүлээж байсан ч Кайсэй хоёр унаатай боллоо.

Кайсэйтэй хамт 10 даваа, нэг унаатай башёг тэргүүлж буй Хакүхо М.Даваажаргал хэдхэн минутын дараа озэки Гоэйдотой барилдана. Хакүхо давбал 11 даваатай болж, башёг ганцаараа тэргүүлж эхлэх юм.

НЭМЭЛТ: 19.00 цаг.

Ёкозүна Хакүхо озэки Гоэйдод, Харүмафүжи сэкивакэ Миёогирюүрд ялагдлаа. Тэгвэл сэкивакэ Тэрүнофүжи Г.Ган-Эрдэнэ озэки Кисэносатог давсан байна. Ийнхүү башёг Хакүхо, Бразилын бөх Кайсэй нар тэргүүлсэн хэвээр үлдлээ.

Ч.БОЛ