ОХУ-ын нийслэл Москва хотоос ням гаригт /2019.05.05/ Мурманскийн чиглэлд хөөрсөн “Sukhoi Superjet 100” нисэх онгоц хөөрөөд хагас цагийн дараа техникийн саатал гарч, Шереметьевогийн нисэх буудалд ослын буулт хийх үеэр онгоц шатсан юм.

СУ 1492 чиглэлийн уг онгоцонд нийт 73 зорчигч, нисэх багийн таван гишүүн явснаас 41 хүн амь үрэгдсэн билээ. Гэхдээ амьд үлдсэн зорчигчдын мэдээлж буйгаар, ослоос илүү олон хүн амьд гарч болох байсан гэнэ. Учир нь онгоц ослын буулт хийж, шатах үеэр урдуур суудал буюу гарцтай ойр байсан зарим зорчигчид ачаа тээшээ авч гарах гэж гарцыг бөглөснөөр бусдынхаа амьд гарах боломжийг үгүй хийсэн байна. Онгоц осолдсоноос нэг цаг орчмын дараа нисэх буудлаас ачаагаа аваад гарч буй нэгэн зорчигчийн зураг бичлэг цахим сүлжээнд таржээ.

Түүнийг Дмитрий Хлебушкин гэдэг бөгөөд онгоц ослын буулт хийхэд бүх зорчигчид хүний амь насыг эн тэргүүнд тавьж, ачаа тээшээ үлдээж онгоцноос аль болох хурдан гарах ёстой гэж аюулгүй ажиллагааны дүрэмд заасан байдаг.

Одоогоор онгоц осолдох болсон шалтгааныг шалгаж байгаа ба цаг агаарын байдал буюу аянга цахилгаанаас болж онгоц шатсан, техникийн саатал юм уу нисгэгчийн хариуцлагагүй үйлдлээс болж онгоц ослын буулт хийх болсон гэсэн гурван таамгийн дагуу мөрдөн шалгах ажиллагаа үргэлжилж байгаа ажээ.

Эх сурвалж: www.thesun.co.uk

ОХУ-д болсон үйл явдалтай холбоотойгоор зураач С.Цогтбаяр эмгэнэлээ шог зургаар илэрхийлжээ